கோவையில் இந்து சமய அறநிலைய துறை கோவில்களில் பணியாற்றும் அர்ச்சகர்கள், பணியாளர்களுக்கு பொங்கலை முன்னிட்டு புத்தாடைகள் வழங்கல்..!

கோவை: கோவையில் இந்து சமய அறநிலையத் துறை கோவில்களில் பணியாற்றும் அர்ச்சகர்கள், கோவில் பணியாளர்களுக்கு பொங்கலை முன்னிட்டு புத்தாடை சீருடைகளை மாவட்ட ஆட்சியர் வழங்கினார்.



தைத்திருநாள் பொங்கலை முன்னிட்டு தமிழகம் முழுவதும் இந்து சமய அறநிலையத் துறையின் கீழ் பணியாற்றும் அர்ச்சகர்கள், பாட்டாச்சாரியார்கள், பூசாரிகள் ஆகியோருக்கு புத்தாடைகள் மற்றும் திருக்கோவில் பணியில் ஈடுபடும் ஊழியர்களுக்கு சீருடைகளும் வழங்கப்பட்டு வருகிறது.

அதன் ஒரு பகுதியாக, கோவை மாவட்டத்தில் இந்து சமய அறநிலையத்துறை கீழ் பணியாற்றி வரும் அர்ச்சகர்கள், பட்டாச்சாரியார்கள், பூசாரிகள் என 429 நபர்களுக்கு புத்தாடைகளும், திருக்கோவில்களில் பணிபுரிந்து வரும் பணியாளர்கள் 352 ஆண்கள் மற்றும் 310 பெண்கள் ஆகியோருக்கு சீருடைகள் வழங்கப்பட்டது.

மாவட்டம் முழுவதும் ரூ.23 லட்சம் மதிப்பிலான இந்த நலத்திட்டங்களை, 1091 பயனாளிகளுக்கு கோவை மாவட்ட ஆட்சியர் சமீரன் வழங்கினார்.