சேரன் மாநகர் அருகே டாஸ்மாக் கடை திறக்கப்படாது: மக்கள் கோரிக்கையை ஏற்று அமைச்சர் செந்தில் பாலாஜி உத்தரவு!

கோவை: கோவை, விளாங்குறிச்சி ரோட்டில் அமைந்துள்ளது சேரன் மாநகர் அரசு போக்குவரத்து கழக ஊழியர்கள் மற்றும் அதிகாரிகள் குடியிருப்பு பகுதி. ஹோப் காலேஜ் முதல் விளாங்குறிச்சி வரை, இடைப்பட்ட பகுதிகளில் தற்போது செயல்பட்டு வரும் மதுபான கடைகளால் ஏற்கனவே மக்கள் மிகுந்த சிரமத்திற்கு ஆளாகி வரும் நிலையில்,

பால்காரர் தோட்டம் பஸ் ஸ்டாப் அருகே புதிதாக டாஸ்மாக் மதுபான கடை அமைக்க நடவடிக்கை மேற்கொள்ளப்பட்டு வருகிறது.

போக்குவரத்து நெரிசல் மிகுந்த இந்த ரோட்டில் மீண்டும் ஒரு டாஸ்மாக் கடையா? என்று அதிர்ச்சியில் இருந்த அபப்குதி மக்கள், உடனடியாக டாஸ்மாக் மதுபான கடை அமைக்கும் நடவடிக்கையை கைவிட வேண்டும் என்ற கோரிக்கை முன்வைத்தனர்.

இதையடுத்து, 22வது வார்டு கவுன்சிலர் கோவை பாபு, பிரச்சனை குறித்து திமுக மாவட்ட செயலாளர் பையாகிருஷ்ணனிடம் தெரிவித்தார். இதையடுத்து, இருவரும் அமைச்சர் செந்தில் பாலாஜியியை நேரில் சந்தித்து பிரச்சனை குறித்து எடுத்துக் கூறினர்.

மக்கள் நலனை கருத்தில் கொண்டு, உடனடியாக அதிகாரிகளிடம் சம்பந்தப்பட்ட பகுதியில் டாஸ்மாக் மதுபான கடை திறக்கக் கூடாது எனஅமைச்சர் செந்தில் பாலாஜி உத்தரவிட்டுள்ளார்.

அமைச்சரின் இந்த உத்தரவால், விளாங்குறிச்சி பகுதி மக்கள் நிம்மதி அடைந்துள்ளனர் என்பது குறிப்பிடத்தக்கது.