வால்பாறையில் ஆடி18-ல் கொரோனா கட்டுப்பாடு... கோயிலில் குறைந்தளவு மக்கள் சாமி தரிசனம்..!

வால்பாறை: ஆண்டுதோறும் ஆடி பதினெட்டில் கோயில்களில் சாமி தரிசனம் வேண்டி பெருமளவில் குவியும் நிலையில், இந்தாண்டு கொரோனா பெருந்தொற்று மீண்டும் பரவும் அச்சத்தால் குறைந்த அளவு மக்களே சாமி தரிசனம் செய்தனர்.

கோவை மாவட்டம் வால்பாறையில் தமிழ் மாதமான ஆடி 18 ஆம் தேதியான இன்று தமிழகம் முழுவதும் உள்ள முக்கிய கோயில்களில் வழிபாடு செய்வதும், மற்றும் புனித நீராடவும் தமிழக அரசு தடை விதித்துள்ளது. அந்தவகையில், கோயிலில் ஆடி 18 அன்று ஒவ்வோர் ஆண்டும் சாமி கும்பிடுவதும் பொதுமக்கள் திதி, தர்ப்பணம் செய்வதும், புதுமண தம்பதிகள் மாலைகளை மாற்றி ஆற்றில் விட்டு புதிய தாலியினை கட்டிக்கொள்ளும் பல்வேறு நிகழ்வுகள் நடக்கும். ஆனால், இந்த ஆண்டு கொரோனா தடையால், கோயில் வளாகம் முழுவதும், ஆற்று பகுதிகளில் பொதுமக்கள் நடமாட்டம் இன்றி வெறிச்சோடி காணப்பட்டது.



இருப்பினும் வால்பாறை ஸ்ரீ சுப்பிரமணிய சுவாமி திருக்கோயிலில் மட்டும் குறைந்தளவு மக்கள் வந்து சாமி தரிசனம் செய்து சென்றனர். கோயில் பணியாளர்கள் கோயிலுக்கு வரும் பொதுமக்களுக்கு கை கழுவும் திரவம் கொடுத்து முகக் கவசம் கண்டிப்பாக அணிய வலியுறுத்தினர். முகக் கவசம் அணியாமல் வந்தவர்களை திருப்பி அனுப்பி வைத்தனர்.