சித்தாபுதூர் கருவலூர் மாரியம்மன் கோவிலில் இரண்டாவது முறையாக உண்டியல் உடைத்து திருட்டு

கோவை: கோவை சித்தாபுதூர் பகுதியில் உள்ள கருவலூர் மாரியம்மன் கோவிலில், மர்ம நபர்கள் உண்டியலின் பூட்டை உடைத்து பணத்தை திருடிச் சென்ற சம்பவம் பக்தர்கள் மற்றும் அப்பகுதி மக்களிடையே அதிர்ச்சியை ஏற்படுத்தியுள்ளது.

திருட்டில் ஈடுபட்டவர்கள், உண்டியலை கோவில் வளாகத்திலிருந்து அருகிலுள்ள காலியிடத்திற்கு எடுத்துச் சென்று உடைத்த பின்னர், அதிலிருந்த பண நோட்டுகளை மட்டும் எடுத்துச் சென்றதாக கூறப்படுகிறது. உண்டியலில் இருந்த சில்லறை நாணயங்களையும், கோவிலில் இருந்த வெள்ளிப் பாத்திரங்களையும் திருடாமல் அங்கேயே விட்டுச் சென்றதாக தகவல் வெளியாகியுள்ளது.



இதுகுறித்து அப்பகுதி மக்கள் அளித்த புகாரின் பேரில், காட்டூர் போலீசார் வழக்குப்பதிவு செய்து விசாரணை மேற்கொண்டு வருகின்றனர். சம்பவ இடத்தில் பதிவான சிசிடிவி காட்சிகளை ஆய்வு செய்து, திருட்டில் ஈடுபட்டவர்களை அடையாளம் காணும் பணியும் தீவிரமாக நடைபெற்று வருகிறது.



கொரோனா காலகட்டத்திலும் இதே கோவிலில் இதுபோன்ற உண்டியல் திருட்டு நடைபெற்றிருந்த நிலையில், மீண்டும் அதேபோன்ற சம்பவம் அரங்கேறியிருப்பது பக்தர்கள் மற்றும் அப்பகுதி மக்களிடையே அச்சத்தையும் அதிர்ச்சியையும் ஏற்படுத்தியுள்ளது.

இந்தச் சம்பவத்தில் தொடர்புடையவர்களை விரைந்து கைது செய்வதுடன், கோவில்களின் பாதுகாப்பை மேலும் பலப்படுத்த காவல்துறையும் சம்பந்தப்பட்ட துறைகளும் நடவடிக்கை எடுக்க வேண்டும் என அப்பகுதி மக்கள் வலியுறுத்தியுள்ளனர்.