விளையாட்டு வீரர்களுக்கான சலுகைகள், திட்டங்களை அறிவித்த ஏ.ஏ.ஐ.

சிறந்த விளையாட்டு வீரர்களுக்கான சலுகைகள் மற்றும் திட்டங்களை இந்திய விமானக் கட்டுப்பாட்டு அலுவலகம் (ஏ.ஏ.ஐ) அறிவித்துள்ளது. 

தமிழகம் முழுவதும் பேட்மிண்டன், செஸ், கோ-கோ, டேபிள் டென்னிஸ் போன்ற விளையாட்டுகளில் தொடர்ந்து 2 ஆண்டுகளுக்கும் மேலாக சப்-ஜுனியர், ஜுனியர், சீனியர் அளவில் தேசிய சாம்பியன்ஷிப் மற்றும் சர்வதேச அளவிலான போட்டிகளில் கலந்து கொண்டவர்களுக்கான ஒரு அறிவிப்பை இந்திய விமானக் கட்டுப்பாட்டு அலுவலகம் வெளியிட்டுள்ளது.

அதன்படி, மேற்கண்ட போட்டிகளில், விதிமுறைகளுக்குட்பட்டு தகுதியான வீரர்களைத் தேர்வு செய்து, இந்திய விமானக் கட்டுப்பாட்டு அலுவலகத்திற்கு கீழ் உள்ள அணிகளில் விளையாட அனுமதிக்கப்படுவர். அவர்களுக்கு, தேவையான பயணப்படிகள், மாதப்படிகள் என அனைத்து செலவுகளுக்கும் தொகை வழங்கப்படும். 

இதேபோல, 14 ஆண்டுகளுக்கு மேலாக இந்திய விமானக் கட்டுப்பாட்டு அலுவலகத்திற்கு கீழ் உள்ள அணிகளில் விளையாடி வருபவர்கள், விமானப் போக்குவரத்து துறையில் தற்காலிக ஊழியர்களாகவும் பணியமர்த்தப்படுவர். பின்னர், திறமை மற்றும் பணி வாய்ப்பின் அடிப்படையில் நிரந்தர ஊழியர்களாக பணிமாற்றம் செய்யப்படுவர். தகுதியுடையவர்கள் இதற்கான விண்ணப்பத்தை 19-ம் தேதிக்குள் வந்து சேரும்படி அனுப்பி வைக்க வேண்டும்.