கோவை மாவட்டத்தில் தனிப்படை சோதனை: 183 வழக்குகள் பதிவு, 18 பேர் கைது

கோவை: கோவை மாவட்டத்தில் சட்டவிரோத செயல்கள் மற்றும் குற்றங்களைத் தடுக்கும் நோக்கில் தனிப்படைகள் மூலம் இரண்டு நாள் சோதனை நடத்தப்பட்டது. இந்த சோதனையில் 183 வழக்குகள் பதிவு செய்யப்பட்டதோடு, 18 பேர் கைது செய்யப்பட்டுள்ளனர்.

கோவை மாவட்டத்தில் போதைப் பொருள்களின் பயன்பாட்டை முற்றிலும் ஒழிக்கும் நோக்கில், மாவட்ட காவல் கண்காணிப்பாளர் K. கார்த்திகேயன் தலைமையில் கடந்த அக்டோபர் 12 மற்றும் 13 ஆகிய இரண்டு நாட்களில் மாவட்டம் முழுவதும் திடீர் சோதனை நடத்தப்பட்டது.

இந்த சோதனையில் 86 தனிப்படைகள் மூலம் சுமார் 400 காவல் துறையினர் ஈடுபடுத்தப்பட்டனர். கடந்த 15 ஆண்டுகளில் கஞ்சா வழக்குகளில் சம்பந்தப்பட்ட சுமார் 2,000 பழைய குற்றவாளிகளை கண்காணிக்கும் நடவடிக்கை மேற்கொள்ளப்பட்டது.

சோதனையின் போது, 22 கஞ்சா குற்றவாளிகள் மீது 16 வழக்குகள் பதிவு செய்யப்பட்டன. அவர்களிடமிருந்து சுமார் 28 கிலோ 500 கிராம் கஞ்சா பறிமுதல் செய்யப்பட்டது. சட்டவிரோதமாக மது விற்பனை செய்ததாக 84 பேர் மீது 83 வழக்குகள் பதிவு செய்யப்பட்டன.

தடை செய்யப்பட்ட புகையிலைப் பொருட்கள் விற்பனை செய்ததாக 38 பேர் மீது 38 வழக்குகளும், சட்டவிரோத லாட்டரி விற்பனை செய்ததாக 46 பேர் மீது 46 வழக்குகளும் பதிவு செய்யப்பட்டன. மேலும், குற்ற வழக்குகளில் ஈடுபட்டு தலைமறைவாக இருந்த 18 பேர் கைது செய்யப்பட்டனர்.

இந்த சோதனை நடவடிக்கை மூலம், கோவை மாவட்டத்தில் சட்டவிரோத செயல்களைக் கட்டுப்படுத்தவும், குற்றங்களைத் தடுக்கவும் காவல்துறை தீவிர நடவடிக்கை எடுத்து வருவது தெரிய வந்துள்ளது.