கோவையில் வீட்டின் பூட்டை உடைத்து 6½ பவுன் தங்க நகை திருடிய நபர் கைது

Coimbatore: கோவை காந்திபுரம் 100 அடி சாலை பகுதியில் நடந்த வீடு கொள்ளை வழக்கில் குற்றவாளி கைது செய்யப்பட்டுள்ளார்.

கோவை காந்திபுரம் 100 அடி சாலை பகுதியைச் சேர்ந்த அருள் விமலன் (30) மற்றும் அவரது மனைவி பாண்டி மேகல்வா (29) ஆகியோர் தனியார் நிறுவனத்தில் பணிபுரிந்து வருகின்றனர். கடந்த ஆகஸ்ட் 1 அன்று, பாண்டி வீட்டைப் பூட்டிவிட்டு வேலைக்குச் சென்றார். அவர் மாலையில் வீடு திரும்பியபோது, வீட்டின் பூட்டு உடைக்கப்பட்டிருந்ததைக் கண்டு அதிர்ச்சியடைந்தார். உள்ளே சென்று பார்த்தபோது, பீரோவில் இருந்த 6½ பவுன் தங்க நகைகள் திருடப்பட்டிருந்தன.

இச்சம்பவம் குறித்து பாண்டி ரத்தினபுரி காவல் நிலையத்தில் புகார் அளித்தார். வழக்குப் பதிவு செய்த போலீசார், அப்பகுதியில் உள்ள கண்காணிப்பு கேமரா பதிவுகளை ஆய்வு செய்தனர். இந்த விசாரணையில், கணபதி ஜெயப்பிரகாஷ் நகரைச் சேர்ந்த சந்தோஷ்குமார் (34) என்பவர் திருட்டில் ஈடுபட்டது தெரியவந்தது.

இதையடுத்து, போலீசார் சந்தோஷ்குமாரை செப்டம்பர் 1 அன்று கைது செய்தனர். தற்போது அவரிடம் மேலும் விசாரணை நடத்தி வருகின்றனர். திருடப்பட்ட நகைகளை மீட்கும் முயற்சியில் போலீசார் ஈடுபட்டுள்ளனர்.