கோவை கார் சிலிண்டர் வெடிப்பு குறித்து மாநகர ஆணையரை சந்திக்க வந்த மாவட்ட ஐக்கிய ஜமாத் பொதுச்செயலாளர், அப்துல் ஜப்பார், கோவை மாநகர உளவுத்துறைக்கு அனுபவம் வாய்ந்த பழைய காவலர்களை நியமிக்க வேண்டும் என்று கோரிக்கை விடுத்தார்.
கோவை: கோவை தெற்கு பகுதியில் கார் சிலிண்டர் வெடி விபத்திற்கு பிறகு அசாதாரண சூழல் காரணமாக மக்களிடையே பதற்றம் ஏற்பட்டுள்ளது. இதுதொடர்பாக கோவை மாவட்ட ஜக்கிய ஜமாத்தின் பொதுச்செயலாளர் அப்துல் ஜப்பார் மாநகர ஆணையர் அலுவலகத்திற்கு வந்திருந்தார்.
அப்போது அவர், செய்தியாளர்களை சந்தித்து பேசியதாவது, தீவிரவாத செயலில் ஈடுபட முயற்சி எடுத்திருக்கிறார்கள். கடவுள் தான் கோவை மாநகர மக்களை காப்பாற்றி இருக்கிறார். தீவிரவாத செயலில் ஈடுபட்டதற்கான தண்டனையை கடவுள் வழங்கி இருக்கிறார்.
இந்த செயலில் ஈடுபட்டவர்கள் இன்னும் கோவையில் இருக்கிறார்கள். அவர்களை கண்டுபிடித்து தீவிரவாதத்தை ஒழிக்க கடுமையான நடவடிக்கை எடுக்க வேண்டும். தீவிரவாதத்தை ஒழிக்க ஜக்கிய ஜமாத் காவல் துறைக்கு ஒத்துழைப்பு தருவதோடு இணைந்தும் செயல்படும்.
மாநகர ஆணையரை சந்திக்க வந்ததன் முக்கிய நோக்கமே மாநகர உளவுப்பிரிவு செயல்படவில்லை என்பதால் தான். அவர்கள் முறையாக அரசுக்கு தகவல் சொல்லவில்லையா என்ற கேள்வி எழுகிறது.
மாநகரின் முக்கிய பகுதியில் செயல்படும் குனியமுத்தூர், உக்கடம், பெரிய கடை வீதி, வெரைட்டி ஹால் ரோடு காவல் நிலையங்களில் புதிதாக போடப்பட்ட உளவுத்துறை காவலர்களை எடுத்துவிட்டு, அனுபவம் வாய்ந்த பழைய காவலர்களையே பணியமர்த்த வேண்டும்.
அப்போது தான் உளவுத்துறை சிறப்பாக செயல்பட்டு குற்றங்களை ஒழிக்க முடியும், இவ்வாறு அவர் கூறினார்.