'தமிழ்நாட்டில் தலைவரின் ஆட்டம் ஆரம்பம்' - கோவையில் ஒட்டப்பட்ட பாஜகவின் போஸ்டர்களால் சலசலப்பு..!

கோவை: கோவையில் பிரதமர் மோடி செஸ் விளையாடுவது போன்ற புகைப்படத்துடன் 'தமிழ்நாட்டில் தலைவரின் ஆட்டம் ஆரம்பம்' என்ற வாசகங்களுடன் பாஜகவினர் பல இடங்களில் போஸ்டர் ஒட்டியுள்ளனர்.

கோவை லங்கா கார்னர், டவுன்ஹால் உட்பட பல இடங்களில் பா.ஜ.க சார்பில் சிவா என்பவர் பெயரில் போஸ்டர்கள் ஒட்டப்பட்டுள்ளது. பிரதமர் புகைப்படம் மற்றும் பாஜக கொடியுடன் உள்ள பெரிய போஸ்டர்கள் நகரின் பல இடங்களில் ஒட்டியுள்ளனர்.



அதில் பிரதமர் செஸ் விளையாடுவது போலவும் புகைப்படம் இடம் பெற்றுள்ளதுடன் "தமிழ்நாட்டில் தலைவரின் ஆட்டம் ஆரம்பம்" என்ற வாசகங்கள் இருக்கிறது. கடந்த ஜூலை மாதம் 28-ம் தேதி சென்னை வந்திருந்த பிரதமர் செஸ் ஒலிம்பியாட் நிகழ்ச்சியைத் தொடங்கி வைத்தார்.

பின்னர் 29-ம் தேதி அண்ணா பல்கலைக்கழகத்தில் நடந்த பட்டமளிப்பு விழாவில் பங்கு பெற்று விட்டு அகமதாபாத் சென்றார். பிரதமர் வந்தபோது தமிழகம் வந்த பிரதமரை பாஜக மாநில தலைவர் அண்ணாமலை மற்றும் கட்சி நிர்வாகிகள் சந்தித்துப் பேசினர்.

அதில், தமிழகத்தில் பாஜகவின் வளர்ச்சி பற்றியும், வரும் நாடாளுமன்றத் தேர்தல் குறித்தும் ஆலோசிக்கப்பட்டதாகக் கூறப்படுகிறது. இந்நிலையில், பாஜகவினர் தலைவரின் ஆட்டம் ஆரம்பம் என்ற வாசகத்துடன் போஸ்டர்கள் ஒட்டி உள்ளது குறிப்பிடத்தக்கது.

அதிமுகவினர் இரு அணியாகப் பிரிந்து இருக்கும் நிலையில், இந்த அரசியல் சூழலை பயன்படுத்தி தமிழகத்தில் பாஜகவை வலுப்படுத்த முயன்று வருவது குறிப்பிடத்தக்கது.