எல்லாம் தெரியும் என்ற நினைப்பு கூடாது

புதுடில்லி:'நமக்கு எல்லாம் தெரியும் என்ற நினைப்பில், யாரும் வாழக் கூடாது' என, மத்திய நிதியமைச்சரும், பா.ஜ., மூத்த தலைவருமான அருண் ஜெட்லி பேசினார்.


'இந்தியா - 2016' என்ற புத்தகத்தை, நிதி அமைச்சரும், பா.ஜ., மூத்த தலைவருமான அருண் ஜெட்லி, நேற்று வெளியிட்டார். விழாவில், அவர் பேசியதாவது:இந்த புத்தகத்தில், அரசின் சாதனைகள், கொள்கைகள், திட்டங்கள், நாட்டின் வளர்ச்சிக்கான தகவல்கள் உட்பட, எல்லா விவரங்களும் இடம் பெற்றுள்ளன. இதை எல்லாரும் படிக்க வேண்டும்;




குறிப்பாக, அரசியல்வாதிகளும், பத்திரிகையாளர்களும் கண்டிப்பாக படிக்க வேண்டும். ஏனெனில், இதில் இடம் பெற்றுள்ள பல தகவல்கள், நமக்கு தெரிந்திருக்காது. நமக்கு எல்லாம் தெரியும் என்ற நினைப்பில், யாரும் வாழக் கூடாது.


இந்த புத்தகத்தை முழுமையாக படித்தால், நமக்கு எவ்வளவு விவரங்கள் தெரியவில்லை என்பது புரியும். பார்லி., உறுப்பினர்களுக்கும், அரசு தேர்வு எழுதுபவர்களுக்கும், இந்த புத்தகம் மிகவும் பயனுள்ளதாக இருக்கும். இவ்வாறு அவர் பேசினார்.