கோவை வெள்ளியங்கிரி இரண்டாவது மலையில் மயங்கி விழுந்த தஞ்சாவூர் நபர் உயிரிழப்பு…!

கோவை: கோவை பூண்டி வெள்ளிங்கிரி மலை ஏறிய தஞ்சாவூர் மாவட்டத்தை தொழிலாளி மூச்சுத் திணறல் ஏற்பட்டு உயிரிழந்த சம்பவம் குறித்து போலீசார் விசாரணை மேற்கொண்டு வருகின்றனர்.

தஞ்சாவூர் மாவட்டத்தை சேர்ந்தவர் கரிகாலன் (50). தனியார் உணவகத்தில் பணியாற்றிய அவர் கடந்த 6 மாதங்களுக்கு முன் வேலையை விட்டு விட்டு வீட்டில் இருந்துள்ளார். இந்நிலையில், கோவை பூண்டி வெள்ளிங்கிரி மலை ஏற்றத்திற்காக தனது நண்பர் ராஜசேகர் என்பவருடன் கடந்த 13 ஆம் தேதி கோவை வந்துள்ளார்.

இந்நிலையில் இன்று காலை இருவரும் மலையேற்றத்தில் ஈடுபட்டிருந்தார். அப்போது, இரண்டாவது மலை ஏறும்போது கரிகாலனுக்கு லேசான மூச்சு திணறல் ஏற்பட்டு மயங்கி விழுந்ததாக தெரிகிறது. அப்போது, அருகில் இருந்தவர்கள் சோதித்துப் பார்க்கும்போது அவர் உயிரிழந்தது தெரியவந்தது.

உடனடியாக அங்கிருந்தவர்கள் வனத்துறை, மற்றும் போலீசாருக்கு தகவல் அளித்தனர். இதையடுத்து, உயிரிழந்த கரிகாலலின் உடலை மீட்டு மலை அடிவாரதுக்கு கொண்டு வந்தனர். இதையடுத்து, அவரது உடலை போலீசார் பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர்.

மேலும், சம்பவம் தொடர்பாக வழக்கு பதிவு செய்து விசாரணை மேற்கொண்டு வருகின்றனர்.