கோவை மாநகராட்சி இணையதளத்தில் 2,886-தீர்மானங்கள் பதிவேற்றம்.!!

கோவை: கோவை மாநகராட்சியில் கடந்த 2017-ம் ஆண்டு முதல் நிறைவேற்றப்பட்ட 2,886- தீர்மானங்கள் இணையத்தில் பதிவேற்றப்பட்டுள்ளன.

கோவை மாநகராட்சியில் 2017-ஜூலை மாதம் முதல் 4-ஆண்டுகளாக நிறைவேற்றப்பட்ட 10- ஆயிரத்துக்கும் மேற்பட்ட தீர்மானங்களை மாநகராட்சி இணையதளத்தில் பதிவேற்றம் செய்ய வேண்டும் என நீண்ட நாள்களாகக் கோரிக்கை விடுக்கப்பட்டு வருகிறது.

இது தொடர்பாக, உயர் நீதிமன்றத்தில் சமூக ஆர்வலர் தியாகராஜன் தாக்கல் செய்த வழக்கும் நிலுவையில் உள்ளது. இதைத்தொடர்ந்து, மாநகராட்சி தீர்மானங்களை இணையத்தில் பதிவேற்றம் செய்யக்கூடாது என ஒப்பந்ததாரர்கள் சார்பில் தாக்கல் செய்யப்பட்ட வழக்கும் நீதிமன்றத்தில் நிலுவையில் உள்ளது.

இந்நிலையில், இந்த இரு வழக்குகளில் நீதிமன்றம் எவ்வித தடை உத்தரவும் பிறப்பிக்காத நிலையில், மாநகராட்சி தீர்மானங்களை இணையத்தில் பதிவேற்றம் செய்ய வேண்டும் எனக் கடந்த ஜூன் மாதம் 15ம் தேதி, சமூக ஆர்வலர் தியாகராஜன், மாநகராட்சி கமிஷனர் ராஜகோபால் சுன்கராவிடம் மனு அளித்தார்.

இதைத்தொடர்ந்து, ஜூன் 18ம் தேதி முதல் மாநகராட்சி இணையதளத்தில், 2017 ஜூலை 19ம் தேதி முதல் நிறைவேற்றப்பட்ட தீர்மானங்கள் பதிவேற்றம் செய்யப்பட்டு வருகின்றன. அதன்படி, நேற்று வரை, மாநகராட்சி இணையதளத்தில் கடந்த 2017ம் ஆண்டு முதல் நிறைவேற்றப்பட்ட 2,886 தீர்மானங்கள் பதிவேற்றம் செய்யப்பட்டுள்ளன.