கொட்டும் மழையில் பொள்ளாச்சியில் முதற்கட்ட கொரோனா நிவாரண தொகையைப் பெற்று சென்ற பொதுமக்கள்..!

பொள்ளாச்சி: கொட்டும் மழையையும் பொருட்படுத்தாமல் பொள்ளாச்சியில் முதற்கட்ட கொரோனா நிவாரணத் தொகையான ரூ.2000/-த்தை பொதுமக்கள் பெற்றுச் சென்றனர்.

தமிழக முதலமைச்சராக மு.க.ஸ்டாலின் பொறுப்பேற்ற உடன் தேர்தல் வாக்குறுதிகளை நிறைவேற்றும் விதமாக 5 கோப்புகளில் கையெழுத்திட்டார். அதில் முக்கியத் திட்டமாக அனைத்து குடும்ப அட்டைதாரர்களுக்கு கொரோனா நிவாரண நிதியாக ரூ.4000/- வழங்கப்படும் என்று அறிவித்திருந்தார்.



முதல் தவணையாக ரூ.2000 வழங்கப்படும் என்று அறிவித்ததை அடுத்து, ஏற்கெனவே அதற்கான டோக்கன்கள் வழங்கப்பட்ட நிலையில், பொள்ளாச்சி மற்றும் அதன் சுற்றுவட்டாரப் பகுதிகளில் உள்ள நியாய விலைக் கடைகளில் இன்று காலை 8 மணி முதல் ரூ.2000/- வழங்கப்பட்டது.



கொரோனா அச்சுறுத்தல் காரணமாக சமூக இடைவெளியோடு, கொட்டும் மழையையும் பொருட்படுத்தாமல் பொதுமக்கள் வரிசையில் நின்று தொகையைப் பெற்றுச் சென்றனர். கொரோனா காலத்தில் வாழ்வாதாரத்தை இழந்து உள்ள தங்களுக்கு இந்த உதவித்தொகை என்பது பேருதவியாக இருக்கும் என்று பொதுமக்கள் தெரிவித்துள்ளனர்.