கோவை தெற்கு தொகுதி: வாக்காளர்களுக்கு பணம் கொடுப்பதாக பா.ஜ.கவினர் 12 பேர் மீது வழக்கு பதிவு

கோவை: கோவை தெற்கு சட்டமன்ற தொகுதிக்கு உட்பட்ட சலீவன் வீதி பகுதியில் பா.ஜ.கவினர் வாக்காளர்களுக்கு பணம் கொடுப்பதாக தகவல் கிடைத்ததை தொடர்ந்து, வெரைட்டி ஹால் ரோடு போலீஸார் 12 பேர் மீது வழக்கு பதிவு செய்து விசாரித்து வருகின்றனர்.

சலீவன் வீதி பகுதியில் பா.ஜ.கவினர் வாக்காளர்களுக்கு பணம் கொடுப்பதாக தகவல் கிடைத்ததை தொடர்ந்து போலீசார் சம்பவ இடத்திற்கு சென்றனர். அங்கிருந்த பா.ஜ.கவை சேர்ந்த நபர்களை கலைந்து போகும் படி சொன்ன போது, அவர்கள் அதிகாரிகளின் உத்திரவிற்கு கீழ்படியாமல் வாக்கு வாதத்தில் ஈடுபட்டதாக கூறப்படுகிறது.

இதனையடுத்து அங்கிருந்த பா.ஜ.கவினர் கருணாகரன், சேகர் உட்பட 12 பேரை காவல் நிலையத்திற்கு அழைத்து வந்த போலீஸார், அவர்களிடம் இருத்து 6 வாகனங்களை பறிமுதல் செய்து விசாரணை நடத்தியதில், அவர்களிடம் இருந்து ரூபாய் 46,000 பணம் மற்றும் 1000 ரூபாய் பரிசு கூப்பன், 500 ரூபாய் பரிசு கூப்பன், பா.ஜ.க தொப்பிகள், கொடிகள், வாக்காளர் பட்டியல், காசோலைகள், ஏடிஎம் கார்டு, கிரிடெட் கார்டு உட்பட பல்வேறு ஆவணங்களை பறிமுதல் செய்ததாக காவல்துறை வட்டாரம் தகவல் தெரிவித்துள்ளனர்.

பின்னர், கைது செய்யப்பட்ட 12 பேர் மீதும் அரசு அதிகாரிகள் உத்தரவு கீழ்படியாதது, அத்துமீறுதல், கலகம் செய்தல் ஆகிய 3 பிரிவுகளின் கீழ் வெரைட்டிஹால் போலீசார் வழக்கு பதிவு செய்தனர். பின்னர், 12 பேரையும் காவல் நிலைய ஜாமினில் விடுவித்தனர்.



பறிமுதல் செய்யப்பட்ட ஆறு வாகனங்களும் வெரைட்டி ஹால் காவல் நிலையத்தில் நிறுத்தி வைக்கப்பட்டுள்ளது குறிப்பிடத்தக்கது.