பள்ளிகள் திறப்பை முன்னிட்டு அக்டோபர் 1 ஆம் தேதி முதல் கோவையில் கூடுதலாக 300 அரசு பஸ்கள் இயக்க திட்டம்

கோவை: தமிழத்தில் வரும் 1ம் தேதி முதல் பள்ளிகள் திறக்கப்படுவதை முன்னிட்டு, கோவையில் கூடுதலாக 300 பஸ்கள் இயக்க திட்டமிடப்பட்டுள்ளதாக, கோவை அரசு போக்குவரத்துக் கழக அதிகாரிகள் தகவல் தெரிவித்துள்ளனர்.

தமிழக அரசு வரும் 1ம் தேதி முதல் 10, 11, 12 ஆகிய வகுப்புகளுக்கு பள்ளிகள் திறக்கப்படும், என்று அறிவித்துள்ளது. பள்ளிகள் திறக்கப்பட உள்ளதால், மாணவ, மாணவிகள் தாங்கள் படிக்கும் பள்ளிகளுக்கு சென்று வர வசதியாக, கோவை அரசு போக்குவரத்து கழகம் சார்பில் வரும் 1ம் தேதி முதல் கூடுதலாக 300 அரசு டவுன் பஸ்கள் இயக்க திட்டமிடப்பட்டுள்ளது. 

இதுகுறித்து கோவை அரசு போக்குவரத்து கழக அதிகாரிகள் கூறுகையில், "கோவை மாவட்டத்தில் தற்போது 287 அரசு பஸ்கள் இயக்கப்படுகின்றன. பள்ளிகள் திறக்கப்பட உள்ளதால், பஸ்களில் பயணம் செய்யும் பயணிகளின் எண்ணிக்கையை அதிகரிக்க கூடும். எனவே, மாணவ, மாணவிகளின் நலன் கருதி கூடுதலாக 300 டிவுன் பஸ்கள் இயக்க திட்டமிட்டுள்ளோம்."

கொரோனா தொற்று காரணமாக, வழக்கமாக பள்ளி மாணவ, மாணவிகளுக்கு வழங்கப்படும், நடப்பாண்டிற்கான இலவச பஸ் பாஸ் வழங்கப்படவில்லை. எனவே, அவர்கள் கடந்த ஆண்டு வழங்கப்பட்ட இலவச பஸ் பாஸ்சை கண்டக்டரிடம் காண்பித்தால் போதுமானது. மேலும் மாணவர்கள் சீருடையில் இருந்தாலே அவர்களிடம் டிக்கெட் கட்டணம் பெறக்கூடாது என்று கண்டக்டருக்கு அறிவுறுத்தப்பட்டுள்ளது, என்றனர்.