கோவை மாவட்டத்தில் ஊரக உள்ளாட்சி தேர்தலில் 6956 பேர் போட்டி; 262 பேர் போட்டியின்றி தேர்வு

கோவை: கோவை மாவட்டத்தில் ஊரக உள்ளாட்சி தேர்தலில் 6956 வேட்பாளர்கள் போட்டியிடுகின்றனர்; 262 பேர் போட்டியின்றி தேர்வு செய்யப்பட்டுள்ளனர்.

தமிழகத்தில் புதியதாக பிரிக்கப்பட்ட 9 மாவட்டங்களை தவிர்த்து ஊரக உள்ளாட்சி அமைப்புகளுக்கான தேர்தல் இரண்டு கட்டங்களாக நடக்கிறது. அதன்படி, வரும் 27, 30 ஆகிய தேதிகளில் கோவையில் தேர்தல் நடக்கிறது. இதற்கான வேட்பு மனு தாக்கல் கடந்த 9ம் தேதி முதல் துவங்கி, 16ம் தேதியுடன் முடிவடைந்தது.

கோவை மாவட்டத்தில் 12 ஊராட்சி ஒன்றியங்கள் உள்ளது. இதில் 228 ஊராட்சிகளுக்கு தேர்தல் நடத்தப்படவுள்ளது. மேலும், 228 கிராம ஊராட்சிகளில் 2,034 வார்டு கவுன்சிலர், 155 மாவட்ட கவுன்சிலர், 228 கிராம பஞ்சாயத்து தலைவர் பதவி, 17 மாவட்ட வார்டு கவுன்சிலர் பதவிக்கு தேர்தல் நடக்கிறது. 

இந்தநிலையில், மொத்தம் 8727 பேர் மனு தாக்கல் செய்தனர். அதில் 161 வேட்பு மனுக்கள் நிராகரிக்கப்பட்டன, 1348 வேட்பு மனுக்கள் வாபஸ் பெறப்பட்டன மீதம் உள்ள 7218 வேட்பு மனுக்களில் 262 பேர் போட்டியின்றி தேர்வு செய்யப்பட்டுள்ளனர். ஆக, மொத்தம் 6956 பேர் உள்ளாட்சி தேர்தலில் போட்டியிடுகின்றனர். 

அதில் மாவட்ட ஊராட்சி வார்டு உறுப்பினர் பதவிக்கு 72 பேரும், ஊராட்சி ஒன்றிய வார்டு உறுப்பினர் பதவிக்கு 596 , ஊராட்சி மன்ற தலைவர் பதவிக்கு 778, ஊராட்சி வார்டு உறுப்பினர் பதவிக்கு 5510 பேர் போட்டியிடுகின்றனர்.