கொச்சின் துறைமுகத்திற்கு கோவை முக்கிய வர்த்தக ஸ்தலமாக திகழ்கிறது : கொச்சின் துறைமுக தலைவர் தகவல்

கோவை : கொச்சின் துறைமுகத்திற்கு கோவை முக்கிய வர்த்தக ஸ்தலமாக விளங்கி வருவதாக கொச்சின் துறைமுக தலைவர் பீனா தெரிவித்துள்ளார். 



இந்திய தொழில் வர்த்தக சபையின் சார்பில் உற்பத்தி தொடர்பாக இன்று நடைபெற்ற கூட்டத்தில் கொச்சின் துறைமுக தலைவர் பீனா கலந்து கொண்டார். இந்தக் கூட்டத்தில் அவர் பேசியதாவது :- கொச்சின் துறைமுகத்திற்கு சரக்குகள் ஏற்றுமதி, இறக்குமதி செய்வதில் கோவை முக்கிய பங்கு வகிக்கிறது. அதாவது, கோவையில் இருந்து மட்டும் சுமார் 25 சதவீதம் கொச்சின் துறைமுகத்தில் இருந்து ஏற்றுமதியும், இறக்குமதியும் செய்யப்படுகிறது. ஒவ்வொரு மாதமும் 5,000-க்கும் மேற்பட்ட கண்டெய்னர்களில் ஏற்றுமதி, இறக்குமதி செய்யப்படுகிறது. கடந்த 2018-ம் ஆண்டு கொச்சின் துறைமுகம் 9 சதவீதம் வளர்ச்சி பெற்றது. தற்போது, நடப்பாண்டின் 2 மாதங்களில் மட்டும் 11 சதவீதம் வளர்ச்சியடைந்துள்ளது.



கோவைக்கு மிகவும் அருகாமையிலும், சர்வதேச நாடுகளுக்கான நெருக்கமான வழித்தடமாகவும் கொச்சின் துறைமுகம் விளங்குகிறது. நாட்டில் அதிவேகமாக வளர்ந்து வரும் சரக்கு ஏற்றுமதி, இறக்குமதி மையமாக இருக்கிறது. தென்னிந்தியாவில் சுமார் 90 ஆண்டுகளாக கொச்சின் துறைமுகம் தனது பங்களிப்பை அளித்து வருகிறது. எனவே, கொச்சின் துறைமுகத்தின் உள்கட்டமைப்பு பணிகளை மேம்படுத்தும் பணிகளில் அதிகாரிகள் ஈடுபட்டு வருகின்றனர், எனக் கூறினார்.