உதகை ரோஜா பூங்காவில் சுற்றுலாப் பயணிகளை கவரும் 40 ஆயிரம் ரோஜா செடிகள்

நீலகிரி : உதகை ரோஜா பூங்காவில் உள்ள ஐந்து அடுக்கில் 4 ஆயிரத்து 200 வகைகளைச் சேர்ந்த 40 ஆயிரம் ரோஜா செடிகள் காட்சிக்கு வைக்கப்பட்டுள்ளதால் சுற்றுலாப் பயணிகள் ஆர்வத்துடன் க ரசித்து வருகின்றனர்.



கோடை சீசனையொட்டி நூற்றாண்டு பழமை வாய்ந்த உதகை அரசு தாவரவியல் பூங்காவில் ஆண்டுதோறும் மே மாதம் சுற்றுலா பயணிகளை கவரும் வகையில் மலர் கண்காட்சி நடத்தப்பட்டு வருகிறது. கடந்த 1995–ம் ஆண்டு 100–வது மலர் கண்காட்சி பூங்காவில் நடந்தது. அப்போது, தமிழக முதலமைச்சராக இருந்த ஜெயலலிதா, உதகை விஜயநகரம் பகுதியில் ரோஜா பூங்காவை தொடங்கி வைத்தார். உதகை ரோஜா பூங்கா 4.40 ஹெக்டர் பரப்பளவில் அமைந்து உள்ளது. மலைச்சரிவான பகுதி மற்றும் 5 அடுக்குகளில் 4 ஆயிரத்து 200 வகைகளை சேர்ந்த 40 ஆயிரம் ரோஜா செடிகள் பராமரிக்கப்பட்டு வருகின்றன. 



கோடை சீசனை முன்னிட்டு, அந்த செடிகளில் ரோஜா மலர்கள் பூத்துக் குலுங்குகின்றன. உதகை ரோஜா பூங்காவின் நுழைவு வாயில் பகுதியில் மறைந்த முதலமைச்சர் ஜெயலலிதா நட்டு வைத்த ரோஜா செடி தற்போதும் உள்ளது. அந்த ரோஜா செடிக்கு ஜெயலலிதா என்று பெயரிடப்பட்டு இருக்கிறது. மேலும், வெளிநாடுகளில் இருந்து கொண்டு வந்த ரோஜா செடிகளும் உள்ளன. 



உலக ரோஜா சம்மேளனம், விசேஷ ரோஜா மலர்கள் மற்றும் இந்தியாவிலேயே சிறந்த ரோஜா பூங்காவுக்கான விருதை கடந்த 2006–ம் ஆண்டு ரோஜா பூங்காவுக்கு வழங்கியது. மேலும், இந்தப் பூங்காவில் ஹெரிடேஜ் கார்டன் மற்றும் டேபிள் ரோஜாக்கள் பூத்துக் குலுங்குகிறது. அலங்கார செடிகள் அழகாக காட்சி தரும் வகையில் வெட்டி விடப்பட்டு இருக்கிறது. இது சுற்றுலாப் பயணிகளை கவர்ந்து உள்ளது. பூத்துக்குலுங்கும் ரோஜா மலர்களை சுற்றுலாப் பயணிகள் கண்டு ரசிப்பதோடு, அதனை தங்களது செல்போனில் புகைப்படம் எடுத்து மகிழ்கின்றனர்.