அமித்ஷா சென்னை வருகைக்கு எதிர்ப்பு: டுவிட்டரில் டிரென்டான #goback அமித்ஷா

சென்னை: பா.ஜ.க., தேசிய தலைவர் அமித்ஷா சென்னையில் இன்று சுற்றுப்பயணம் செய்து வரும் நிலையில், #goback அமித்ஷா என்ற ஹேஸ்டேக் டுவிட்டரில் டிரென்டாகியுள்ளது. 

மக்களவைத் தேர்தலுக்கு வியூகம் வகுப்பதற்காக பா.ஜ.க., தேசிய தலைவர் அமித்ஷா இன்று சென்னை வந்துள்ளார். அவரை தமிழக பா.ஜ.க., தலைவர் தமிழிசை சவுந்தரராஜன், மத்திய இணையமைச்சர் பொன். ராதாகிருஷ்ணன் ஆகியோர் வரவேற்றனர். சென்னை ஈச்சம்பாக்கத்தில் அமித்ஷா தலைமையில் ஆலோசனைக் கூட்டம் நடைபெற்று வருகிறது. இதைத் தொடர்ந்து, மாலை 4 மணி வரை பா.ஜ., நாடாளுமன்ற தொகுதி பொறுப்பாளர்கள் மற்றும் அமைப்பாளர்கள் கூட்டத்தில் அமித்ஷா பங்கேற்கிறார்.

மாலை 4.30 மணி முதல் 5.30 மணி வரை சகோதர இயக்கங்களுடன் கலந்துரையாடுகிறார். மாலை 6 மணி முதல் இரவு 7.30 மணி சக்தி மற்றும் மகா சக்தி கேந்திரா அமைப்பின் பொறுப்பாளர்களை சந்தித்து கலந்துரையாடுகிறார்.

இந்த நிலையில், அமித்ஷாவின் சென்னை வருகைக்கு எதிர்ப்பு தெரிவிக்கும் வகையில், டுவிட்டரில் #goback அமித்ஷா (#goback Amith shah) என்ற ஹேஸ்டேக் டிரென்டாகியுள்ளது. கடந்த சில நாட்களுக்கு முன்பு பிரதமர் மோடி தமிழகம் வந்திருந்த போது, #goback மோடி என்ற ஹேஸ்டேக் தேசிய அளவில் டிரென்டாகியது. பிரதமர் மோடியை தொடர்ந்து, தற்போது அமித்ஷாவிற்கு டுவிட்டர் மூலமாக எதிர்ப்பு கிளம்பியுள்ளது.

தமிழகத்தில் கால்பதிக்க வேண்டும் என பா.ஜ.க.,வினர் முழு முயற்சியில் ஈடுபட்டு வரும் நிலையில், அடுத்தடுத்த பா.ஜ.க., தலைவர்களுக்கான இது மாதிரியான ஹேஸ்டேக்குகள் அக்கட்சியினரை அதிருப்தியில் ஆழ்த்தியுள்ளது.