பொறியியல் பணிகளுக்காக கன்னூர் - மாஹி இடையிலான ரயில் போக்குவரத்தில் மாற்றம்

கோவை: இது தொடர்பாக தெற்கு ரயில்வே வெளியிட்டுள்ள அறிக்கையில், பொறியியல் பணிகள் காரணமாக கன்னூர்  - மாஹி இடையே வரும் 02-ம் தேதி முதல் 28-ம் தேதி வரையில் ஞாயிறு மற்றும் புதன்கிழமைகளைத் தவிர பிற நாட்களில் இயக்கப்படும் ரயில்களின் சேவைகளில் மாற்றம் செய்யப்பட்டுள்ளது. 

அதாவது, ரயில் எண் : 56323 கோவை - மங்களூரூ ரயில்நிலையம் அதிவிரைவு பயணிகள் ரயிலின் சேவை சொர்ணூர் மற்றும் கன்னூர் இடையே ரத்து செய்யப்படுகிறது. இதேபோல, ரயில் எண் : 56324 மங்களூரூ ரயில்நிலையம் - கோவை அதிவிரைவு பயணிகள் ரயிலின் சேவை, கன்னூர் மற்றும் சொர்ணூர் இடையே ரத்து செய்யப்படுகிறது 2-ம் தேதி முதல் 28-ம் தேதி வரை (ஞாயிறு, புதன் தவிர) 20 நாட்களுக்கு இந்த மாற்றம் செய்யப்பட்டுள்ளது. 

மாவெல்லிப்பாளையம் - மகுடன்சாவடி இடையே பொறியியல் பணிகள் நடைபெற்று வருவதால், 4-ம் தேதி முதல் அடுத்த மாதம் 10-ம் தேதி வரை ரயில் எண் :22609 மங்களூரூ - கோவை ரயில் சுமார் 30 நிமிடங்கள் தாமதமாக கோவை ரயில்நிலையம் வந்தடையும். ரயில் எண் : 07115 ஐதராபாத் - கொச்சிவெலி வாராந்திர சிறப்பு ரயில் ஞயிற்றுக்கிழமைகளில் மட்டும் (08, 15, 22, 29, ஆகஸ்ட் 05) 30 நிமிடம் சேலத்தில் நிறுத்தப்படும். செவ்வாய்க்கிழமைகளில் சேலம் வந்தடையும் பிலாஷபூர்-எர்ணாகுளம் வாராந்திர சிறப்பு ரயில் சேலத்தில் 10, 17, 24, 31 மற்றும் ஆகஸ்ட் 07 ஆகிய தேதிகளில் 45 நிமிடங்கள் தாமதமாக இயக்கப்படும்.

இதேபோல, ரயில் எண் : 66602/66603 கோவை - சேலம் - கோவை ரயிலின் சேவை வரும் 04-ம் தேதி முதல் அடுத்த மாதம் 10-ம் தேதி வரை 38 நாட்களுக்கு ஈரோடு-சேலம்-ஈரோடு இடையிலான சேவை ரத்து செய்யப்படுகிறது.