அரசியலுக்கு வந்தால் ரஜினி புஸ்வானம் ஆகிவிடுவார்: சீரியஸாய் கலாய்க்கும் சீமான்

தமிழக அரசியல் கால் உடைந்த நாற்காலியாய் ஆடிக்கொண்டிருக்க, ஜெ.வின் மறைவு ஏற்படுத்திய வெற்றிடத்தை நிரப்ப பலரும் கங்கணம் கட்டியுள்ளனர்.

ஒவ்வொரு பட ரிலீசுக்கும் முன்பாக, 'நான் அரசியலுக்கு வருவேனா என்பதை ஆண்டவன் பார்த்துக்கொள்வான்' என்று கூறிவரும் சூப்பர்ஸ்டார் ரஜினிகாந்த், இந்த முறை ரசிகர்களோடு மீட்டிங், அரசியல் பேச்சு என சூட்டை கிளப்பிவிட்டார்.

இதை சில அரசியல் கட்சிகள் வரவேற்றாலும், பலர் மொழியை அடிப்படையாக கொண்டு ரஜினியின் அரசியல் பிரவேசத்துக்கு எதிரான கருத்துக்களை வெளியிட்டனர்.

ஆரம்பகட்டத்தில் இருந்து நாம் தமிழர் கட்சியின் ஒருங்கிணைப்பாளர் சீமான், ரஜினிகாந்த் அரசியலுக்கு வரக்கூடாது என்று நேரடியாகவே சாடிவந்தார். தொலைக்காட்சி பேட்டிகளிலும், செய்தியாளர் சந்திப்பின் போதும், 'தமிழகத்தில் வாழ்வதற்கு உங்களுக்கு உரிமை உண்டு, ஆள்வதற்கு எங்களுக்குத்தான் உரிமை உண்டு' என்ற கருத்துக்களை பதிவு செய்தார்.

இந்நிலையில், இன்று காலை தஞ்சையில் செய்தியாளர்களிடம் பேசிய சீமான், தமிழ்நாட்டிற்கு காமராஜர், கக்கன் போன்ற தலைவர்கள் தான் தேவை. ரஜினி அரசியலுக்கு வந்தால் தீபாவளிக்கு வெடிக்கும் பெரிய வெடி வெடிக்காமல் போவது போல புஸ்வானம் ஆகிவிடுவார்.

இத்தனை நாளாய் ரஜினி அரசியலுக்கு வருவதாக கூறிவருகிறார். அப்படி அவர் அரசியலுக்கு வந்தால், 'வச்சி செஞ்சு அனுப்புவோம்' என்று கூறியுள்ளார்.