கோவையில் உரிமம் இல்லாமல் கிராவல் மண் கடத்திய நபர் கைது: டிப்பர் லாரி மற்றும் மண் பறிமுதல்

கோவை: கோவையில் செப்டம்பர் 13 ஆம் தேதி, உரிய அனுமதியின்றி கிராவல் மண் கடத்தி வந்த லாரியை வருவாய் துறை அதிகாரிகள் தடுத்து நிறுத்தி, கடத்தப்பட்ட கிராவல் மண்ணை பறிமுதல் செய்துள்ளனர்.

கோவை கலெக்டர் அலுவலக சிறப்பு வருவாய் ஆய்வாளர் விஜயகுமார் தலைமையிலான அதிகாரிகள் துடியலூர் - பன்னிமடை சாலையில் வாகன சோதனையில் ஈடுபட்டனர். பழனிகவுண்டன் புதூர் அருகே வந்த டிப்பர் லாரியை மடக்கி சோதனை செய்தபோது, உரிய அனுமதியின்றி கிராவல் மண் கடத்தியது கண்டுபிடிக்கப்பட்டது.

இதைத் தொடர்ந்து, விஜயகுமார் துடியலூர் காவல் நிலையத்தில் புகார் அளித்தார். புகாரின் பேரில் நடவடிக்கை எடுக்கும் விதமாக காவல்துறையினர் கிராவல் மண் கடத்திய டிப்பர் லாரி மற்றும் 3 யூனிட் கிராவல் மண்ணை பறிமுதல் செய்தனர்.

கிராவல் மண் கடத்தலில் ஈடுபட்ட திருப்பூர் மாவட்டம் காங்கயத்தை சேர்ந்த சாலமோன் ராஜ் (36) என்பவரை காவல்துறையினர் கைது செய்தனர். சட்டவிரோதமாக உரிய அனுமதியின்றி மணல் எடுப்பில் ஈடுபடுபவர்கள் மீது கடும் நடவடிக்கை எடுக்கப்படும் என அதிகாரிகள் எச்சரிக்கை விடுத்துள்ளனர்.