கொல்கத்தா மருத்துவர் கொலை: கோவை கே.ஜி மருத்துவமனையில் கண்டன ஆர்ப்பாட்டம்

கோவை: கொல்கத்தாவில் பெண் மருத்துவர் கொலை செய்யப்பட்டதற்கு கண்டனம் தெரிவித்து கோவையில் உள்ள கே.ஜி மருத்துவமனை மருத்துவர்கள் ஆர்ப்பாட்டம் மேற்கொண்டனர்.

கொல்கத்தாவில் முதுநிலை பெண் பயிற்சி மருத்துவர் பாலியல் கொடுமைக்கு உள்ளாக்கப்பட்டு கொலை செய்யப்பட்ட சம்பவம் நாடு முழுவதும் அதிர்வலையை ஏற்படுத்தியுள்ளது. இந்த சம்பவத்தை கண்டித்து நாடு முழுவதும் போராட்டங்கள் நடைபெற்று வருகின்றன.



கோவையில் உள்ள கே.ஜி மருத்துவமனையில் சுமார் 20க்கும் மேற்பட்ட மருத்துவர்கள் கண்டன ஆர்ப்பாட்டத்தில் ஈடுபட்டனர். அவர்கள் கண்டன முழக்கங்களை எழுப்பினர்.

இந்த ஆர்ப்பாட்டத்தில் கலந்து கொண்டு பேசிய கே.ஜி மருத்துவமனை தலைவர் டாக்டர் பக்தவச்சலம், "மருத்துவர்கள் கொலை நடப்பது என்பது முட்டாள்கள் கையில் தேசம் இருக்கிறது என்பதை குறிக்கிறது" என்று கூறினார்.

மேலும் அவர், "காவல்துறையும் அரசு நிர்வாகமும் மருத்துவர்களுக்கு உரிய பாதுகாப்பு அளிக்க வேண்டும். கஞ்சாவை ஒழிக்க வேண்டும். மதுபானங்களை குறைக்க நடவடிக்கை எடுக்க வேண்டும்" என்று கேட்டுக்கொண்டார்.

இந்த சம்பவத்தைத் தொடர்ந்து, மருத்துவர்களின் பாதுகாப்பு குறித்த விவாதம் மீண்டும் எழுந்துள்ளது. மருத்துவர்களுக்கு எதிரான வன்முறைகளை தடுக்க கடுமையான நடவடிக்கைகள் எடுக்க வேண்டும் என்ற கோரிக்கை வலுத்துள்ளது.