உடுமலை அருகே சுண்ணாம்பு உற்பத்தி நலிவடைவு; அரசு உதவிக்கு வலியுறுத்தல்

திருப்பூர்: உடுமலை அருகே ஆலம்பாளையம் ஊராட்சியில் சுண்ணாம்பு உற்பத்திக்கு பெயர்பெற்ற கிராமமான கொத்தனூர், சுமார் 100 ஆண்டுகளாக சுண்ணாம்பு உற்பத்தி செய்து வருகிறது.



இங்குள்ள சுண்ணாம்பு கோவை, பழனி, திருப்பூர் உள்ளிட்ட பகுதிகளில் விற்பனை ஆகும். ஆனால், நாகரிகத்தின் வளர்ச்சி, மூலப் பொருட்கள் விலை உயர்வு, ஆட்கள் பற்றாக்குறை, பயன்பாடு குறைவு ஆகியவையால் சுண்ணாம்பு உற்பத்தி தொழில் அழிவின் விளிம்பில் நிற்கிறது.



சுண்ணாம்பு உற்பத்தியாளர் தெண்டபாணி பேசுகையில், இந்த தொழில் பாரம்பரியமும் பழமையும் மிக்கது என்று குறிப்பிட்டார். சுண்ணாம்பு உற்பத்திக்கு அவசியமான மூலப்பொருட்களான அடுப்புக்கரி, தேங்காய் மட்டை, விறகு, ஓடை கற்கள் தேவை. சுண்ணாம்பு தயாரிப்பில் முக்கிய பங்கு வகிக்கும் ஓடை கற்கள் கோவை மாவட்டத்திலிருந்து வாங்கப்படுகிறது.



இந்த ஓடை கற்கள் சூளையில் வேக வைக்கப்பட்டு, கால்சியம் சத்து மிகுந்த சுண்ணாம்பு தயாராகிறது. முன்பு 50 க்கும் மேற்பட்ட சூளைகளில் சுண்ணாம்பு தயாரிக்கப்பட்டு, மாட்டு வண்டிகளில் சுற்றுப்புற கிராமங்களுக்கு கொண்டு செல்லப்பட்டு விற்கப்பட்டு வந்தது. இப்போது மூன்று சூளைகளில் மட்டுமே சுண்ணாம்பு தயாரிக்கப்படுகிறது. இது பாரம்பரிய மிக்க தொழில் ஆகும் என்பதால், இதன் அழிவை தடுக்க அரசு உதவியும் நிதி உதவியும் அளித்து உதவ வேண்டும் என தெண்டபாணி வலியுறுத்தினார்.