எம்.ஜி.ஆரின் 106வது பிறந்தநாள் - ஊர்வலமாக வந்து கோவை அதிமுகவினர் மலர் மரியாதை

கோவை: மறைந்த முன்னாள் தமிழ்நாடு முதலமைச்சர் எம்ஜிஆரின் 106வது பிறந்தநாள் இன்று கொண்டாடப்பட்டுவருகிறது. இதனையொட்டி, எம்.ஜி.ஆரின் சிலைக்கு அதிமுகவினர் மற்றும் பல்வேறு அரசியல் கட்சியினர் மரியாதை செலுத்தி வருகின்றனர்.



அதன் ஒரு பகுதியாக, கோவை மாவட்டத்தில் உள்ள அதிமுகவினர் அவிநாசிசாலை அண்ணா சிலை பகுதியில் உள்ள எம்.ஜி.ஆரின் சிலைக்கு மாலை அணிவித்து மரியாதை செலுத்தினர்.



அதிமுக கோவை மாநகர் மாவட்ட செயலாளரும், வடக்கு தொகுதி சட்டமன்ற உறுப்பினருமான அம்மன் அர்ச்சுணன் முன்னிலையில், சிங்காநல்லூர் சட்டமன்ற உறுப்பினர் ஜெயராம், கோவை மாநகராட்சி முன்னாள் மேயர் செ.ம.வேலுசாமி உட்பட நூற்றுக்கும் மேற்பட்ட அதிமுகவினர் இதய தெய்வம் மாளிகையில் இருந்து ஊர்வலமாக வந்து எம்ஜிஆர் சிலைக்கு மாலை அணிவித்து மரியாதை செலுத்தினர்.



அதனைத் தொடர்ந்து, இதய தெய்வம் மாளிகையில் உள்ள எம்.ஜி.ஆரின் புகைப்படத்திற்கும் மலர் தூவி மரியாதை செலுத்தப்பட்டது.