கோவையில் மீண்டும் தூய்மை பணியாளர்கள் வேலைநிறுத்தம் - மாநகரில் தேங்கும் குப்பைகள்

கோவை: கோவை மாநகராட்சி பகுதியில் ஒப்பந்த தூய்மை பணியாளர்கள் ஊதிய உயர்வு, நிரந்தர பணி உள்ளிட்ட பல்வேறு கோரிக்கைகளை வலியுறுத்தி பல நாட்களாக போராட்டம் மேற்கொண்டு வருகின்றனர். இதுகுறித்து மாவட்ட ஆட்சியர் மற்றும் மாநகராட்சி ஆணையாளரிடமும் பல்வேறு மனுக்களை அளித்து வந்தனர்.

இந்நிலையில் இது குறித்து மாநகராட்சி மாமன்ற கூட்டத்தில் தீர்மானம் நிறைவேற்றப்படும் என மாவட்ட நிர்வாகம் தரப்பில் தெரிவிக்கப்பட்டிருந்தது.ஆனால், கடந்த சில தினங்களுக்கு முன்பு நடந்த மாநகராட்சி மாமன்ற கூட்டத்தில் தூய்மை பணியாளர்களின் கூலி உயர்வு குறித்த தீர்மானம் மேலோட்டமாக இருந்ததால் அதிருப்தி அடைந்த ஒப்பந்த தூய்மை பணியாளர்கள் வேலை நிறுத்த போராட்டத்தை இன்று முதல் துவங்கி உள்ளனர்.



இதனால் கோவை மாநகரில் குப்பைகள் ஆங்காங்கே தேங்கி உள்ளது. நேற்றைய தினம் தீபாவளி பண்டிகை கொண்டாடப்பட்டுள்ளதால் பல்வேறு இடங்களில் அதிகளவு பட்டாசு பெட்டிகள், வெடித்த பட்டாசுகள், இனிப்பு பெட்டிகள் உட்பட குப்பைகள் எடுக்கப்படாமல் தேங்கி உள்ளது. இதனால் துர்நாற்றம் வீசி வருகிறது.

தற்போது மாநகராட்சியில் பணிபுரியும் நிரந்தர தூய்மை பணியாளர்கள் மட்டுமே பணியில் ஈடுபட்டுள்ளதால் குப்பைகளை அகற்றும் பணி தாமதமாக நடைபெற்று வருகிறது.