பெத்திக்குட்டை வனமரபியல் ஆராய்ச்சி மைய பகுதியில் வனத்துறை அமைச்சர் ஆய்வு

கோவை: கோவை, பெத்திக்குட்டை வனமரபியல் ஆராய்ச்சி மையம் உள்ளிட்ட பகுதிகளில் வனத்துறை அமைச்சர் ராமசந்திரன் திடீர் ஆய்வு செய்தார்.



தமிழக வனத்துறை அமைச்சர் ராமசந்திரன், வனமரபியல் மண்டலம் பெத்திக்குட்டை ஆராய்ச்சி மையத்தில், வனவிலங்குகள் குறிப்பாக காட்டு யானைகள் வனத்தை விட்டு வெளியேறி அருகிலுள்ள கிராமங்கள் மற்றும் விவசாய நிலங்களுக்கும் புகுந்து சேதம் விளைவிப்பதை தடுப்பதற்காக உயிர் வேலியாக ரயில்கள்ளி (cereus pterogonus), மற்றும் சொரமுள் (Sylindropuntia ramosissima) ஆகிய முட்செடிகளைக் கொண்டு நடத்தப்படும் ஆராய்ச்சி பணிகளை ஆய்வு செய்தார்.

இதை தொடர்ந்து கோவை வனக்கோட்டம்,சிறுமுகை வனச்சரகம், பெத்திக்குட்டை சுற்று வனப்பகுதியில் வனவிலங்குகள் மீட்பு, சிகிச்சை மற்றும், மறுவாழ்வு மையம் அமைக்க தேர்வு செய்யப்பட்ட இடத்தினை ஆய்வு செய்து, பின்பு புதுக்காடு பகுதியிலுள்ள பவானிசாகர் அணை நீர்த்தேக்க பகுதிக்கு சென்றார்.



மேலும் அங்கிருந்து படகு மூலம் கூத்தாமுண்டி வடக்கு சுற்று வனப்பகுதியில் உள்ள வேட்டை தடுப்பு முகாமிற்கு சென்று வேட்டைத் தடுப்பு பணிகள் மற்றும் முகாம் பணிகள் குறித்து ஆய்வு செய்தார்.

ஆய்வின் போது வனப்பாதுகாவலர் மற்றும் கள இயக்குனர் ராமசுப்பிரமணியம், மாவட்ட வன அலுவலர் அசோக்குமார், உதவி வனப்பாதுகாவலர் செந்தில்குமார், வனச்சரக அலுவலர்கள், சிறுமுகை வனச்சரகம், மேட்டுப்பாளையம் வனச்சரகம், கோவை ஆராய்ச்சி சரகம், வனப் பணியாளர்கள் உடன் இருந்தனர்.