'சிங்கப்பூரில் வேலை, கைநிறைய சம்பளம்' ஏமாற்றிய நபர், பணத்தை பறிகொடுத்தவர்கள் கோவையில் புகார் மனு..!

கோவை: சிங்கப்பூரில் வேலை வாங்கி தருவதாக கூறி ஏமாற்றிய தனியார் நிறுவனத்தின் மீது நடவடிக்கை எடுக்க கோரி கோவை மாவட்ட காவல் கண்காணிப்பாளர் அலுவலகத்தில் பாதிக்கப்பட்டவர்கள் புகார் மனு அளித்தனர்.



கோவை வடவள்ளி பகுதியில் எல்.எஸ். கன்ஸ்டிரக்ஷன் அபோர்ட் டூரிஸ்ட் அண்ட் டிராவல்ஸ் என்ற நிறுவனம் சிங்கப்பூரில் வேலை வாங்கித் தருவதாக கூறி ஏமாற்றி விட்டதாகவும், இதற்கு நடவடிக்கை எடுக்க கோரியும் 50-க்கும் மேற்பட்ட பாதிக்கப்பட்டவர்கள் கோவை மாவட்ட காவல் கண்காணிப்பாளர் அலுவலகத்தில் புகார் மனு அளித்தனர்.



இதுகுறித்து பாதிக்கப்பட்டவர்கள் தெரிவிக்கையில், செய்தித்தாள்களில் அந்நிறுவனத்தின் விளம்பரத்தை பார்த்து அந்நிறுவனத்தில் தொடர்பு கொண்டதாகவும், சிங்கப்பூரில் பல்வேறு இன்ஜினியரிங் வேலை, வாகன ஓட்டுநர், அட்மின் வேலைகளுக்கு வேலை வாங்கி தருவதாக கூறி ஒவ்வொருவரிடமிருந்தும் பதிவு செய்யும் வேலைக்கேற்ப ஒரு லட்சம் முதல் பணத்தைப் பெற்றுக் கொண்டதாகவும், விமான பயண சீட்டுகளையும் வழங்கிவிட்டு, கடந்த 8-ம் தேதி வாகனம் வந்து பிக்கப் செய்து கொண்டு சென்னை சென்று கொரோனா பரிசோதனைகள் எல்லாம் செய்துவிட்டு பின் சிங்கப்பூர் அழைத்து செல்வோம் எனக் கூறியதாகவும், ஆனால் 8-ம் தேதி மதியம் வரை வாகனம் எதுவும், தங்களை பிக்கப் செய்ய வரவில்லை என்றும், அந்நிறுவனத்தை தொலைப்பேசியில் தொடர்பு கொண்ட பொழுதும் லைன் கிடைக்காமல் இருந்ததாகவும், சிலர் நேரடியாக அங்கு சென்று பார்க்கும் பொழுது அந்நிறுவனம் பூட்டப்பட்டிருந்ததாகவும், பின்பு தான் தாங்கள் ஏமாற்றப்பட்டது தெரிய வந்ததாக தெரிவித்தனர்.



மேலும், அந்த நிறுவனம் தமிழகம் முழுவதும் இருந்து சுமார் 100-க்கும் மேற்பட்டவர்களிடம் இருந்து மூன்று கோடி ரூபாய் வரை பணத்தைப் பெற்றுக் கொண்டு ஏமாற்றியது தெரியவந்ததாகவும், இது குறித்து வடவள்ளி காவல் நிலையத்தில் புகார் தெரிவிக்க பட்டுள்ளதாகவும், கோவை மாவட்ட காவல் கண்காணிப்பாளர் அலுவலகத்திலும் புகார் மனு அளித்துள்ளதாக தெரிவித்தனர்.

மாவட்ட காவல் கண்காணிப்பாளர் உடனடியாக நடவடிக்கை மேற்கொண்டு தங்கள் பணத்தை மீட்டுத் தர வேண்டும் என கோரிக்கை விடுத்துள்ளனர்.