'ரன்வே' பராமரிப்பு பணிக்காக கோவை - ஷார்ஜா விமான நேரம் நாளை முதல் மாற்றம்!

கோவை: கோவை சர்வதேச விமான நிலையத்தில் விமான ஓடுதளம் பராமரிப்பு பணி மேற்கொள்ளப்பட்டு வருகிறது. இதன் காரணமாக அதிகாலை தரை இறங்கும் 'ஏர் அரேபியா' விமானத்தின் நேரம் நாளை முதல் மாற்றியமைக்கப்பட்டுள்ளது.

இது குறித்து கோவை ஏர்போர்ட் வட்டாரங்கள் கூறியதாவது: விமான நிலையங்களில் ரன்வே பராமரிப்பு பணி பத்தாண்டுகளுக்கு ஒரு முறை மேற்கொள்ளப்படுவது வழக்கம். கோவை சர்வதேச விமான நிலையத்தில் சமீபத்தில் இந்தப் பணிகள் துவங்கப்பட்டன. இதன் காரணமாக இரவு 10:00 மணிக்குள் அனைத்து விமான சேவைகளும் நிறைவு பெறும் வகையில் நேரம் மாற்றி அமைக்கப்பட்டுள்ளது. கோவை - ஷார்ஜா இடையே இயக்கப்படும் 'ஏர் அரேபியா' விமானம் அதிகாலை 3:30 மணிக்கு தரையிறங்கி மீண்டும் 4:15 மணியளவில் புறப்பட்டு செல்வது வழக்கம்.

ஓடுதள பராமரிப்பு பணி காரணமாக நாளை முதல் (ஜூன் 16) 'ஏர் அரேபியா' விமானம் இயக்கப்படும் நேரம் மாற்றி அமைக்கப்பட்டுள்ளது. வாரத்தில் தற்போது ஐந்து நாட்கள் கோவை ஷார்ஜா இடையே விமான சேவை வழங்கப்பட்டு வருகிறது. நாளை முதல் காலை 6:30 மணிக்கு விமானம் தரையிறங்கி மீண்டும் காலை 7:20 மணி அளவில் ஷார்ஜா புறப்பட்டுச் செல்லும் வகையில் நேரம் மாற்றி அமைக்கப்பட்டுள்ளது. மேலும் விவரங்களை 'ஏர் அரேபியா' ஏர்லைன்ஸ் அலுவலகத்தில் கேட்டு தெரிந்து கொள்ளலாம். இவ்வாறு ஏர்போர்ட் வட்டாரங்கள் தெரிவித்தன.