ஆழியாறு மற்றும் அமராவதி அணையில் இருந்து பாசனத்திற்கு நீர் திறப்பு..!

திருப்பூர்: அமராவதி அணையில் இருந்து பழைய ஆயக்கட்டு பாசனத்துக்கு இன்று முதல் தண்ணீர் திறந்து விடப்பட உள்ளது.

இதுகுறித்து தமிழக நீர்வளத்துறை கூடுதல் தலைமைச் செயலாளர் சந்தீப் சக்சேனா வெளியிட்ட செய்திக்குறிப்பில் கூறப்பட்டு இருப்பதாவது:-

திருப்பூர் மாவட்டம், அமராவதி அணை பழைய பாசனத்திற்கு உட்பட்ட முதல் 8-பழைய ராஜ வாய்க்கால்களின் (ராமகுளம், கல்லாபுரம், குமரலிங்கம், சர்க்கார் கண்ணாடிப்புத்தூர், சோழமாதேவி, கணியூர், கடத்தூர் மற்றும் காரத்தொழுவு) பாசனப் பகுதிகளுக்கு 16-ந் தேதி முதல் வரும் செப்டம்பர் 28-ந் தேதி வரை 135-நாட்களில் 80-நாட்கள் தண்ணீர் திறப்பு, 55-நாட்கள் தண்ணீர் அடைப்பு என்ற அடிப்படையில் முதல் போக பாசனத்திற்கு அமராவதி அணையில் இருந்து 2,074-மில்லியன் கன அடிக்கு மிகாமல் தண்ணீர் திறந்து விட அரசு ஆணையிட்டுள்ளது.

இதனால் திருப்பூர் மாவட்டத்தில் 7,520-ஏக்கர் நிலங்கள் பாசன வசதி பெறும் என்று தெரிவிக்கப்பட்டுள்ளது.

இவ்வாறு அவர் தெரிவித்துள்ளார்.

அமராவதி அணை வழியாக திருப்பூர், கரூர் மாவட்டத்தில் 54-ஆயிரத்து 637-ஏக்கர் நிலங்கள் பாசன வசதி பெற்று வருகிறது. இந்த நிலையில், வழக்கமாக அணையில் இருந்து பழைய ஆயக்கட்டு பாசன நிலங்களுக்கு ஜூன் மாதம் தான் நீர் திறக்கப்படும் என்ற போதிலும், கடந்த ஆண்டு பருவ மழை போதுமான அளவு கிடைத்ததால், அணைக்கு நீர்வரத்து மற்றும் இருப்பு காரணமாக பழைய ஆயக்கட்டு பாசனத்தில் உடுமலை, மடத்துக்குளம் தாலுகாவில் உள்ள ராஜ வாய்க்கால்களுக்கு மே 16-ல் தண்ணீர் திறக்கப்பட்டு, குறுவை, சம்பா சாகுபடிக்கு நீர் வழங்கப்பட உள்ளது.