கோவை - கோவா இடையே முதல் முறையாக விமானப் போக்குவரத்து சேவை இன்று முதல் துவக்கம்..!

கோவை: கோவை - கோவா இடையே முதல் முறையாக விமானப் போக்குவரத்து சேவை இன்று முதல் துவங்கியது.

கோவை விமான நிலையத்தில் இருந்து இண்டிகோ ஏர்லைன்ஸ் சார்பில் கோவாவிற்கு நேரடி விமான சேவை டிசம்பர் மாதத்தில் துவங்கும் என ஏற்கனவே அறிவிக்கப்பட்டது.

அதன்படி, இன்று (டிசம்., 1) அதிகாலை முதல் விமான சேவை திட்டமிட்டபடி துவங்கியது. அதிகாலை 1: 45 மணிக்கு புறப்பட்ட இந்த விமானத்தில் 40 பேர் பயணம் செய்தனர். இந்த விமானம் அதிகாலை 3:05 மணிக்கு கோவா சென்றடைந்தது.

மீண்டும் 3: 35 மணிக்கு கோவாவில் இருந்து புறப்பட்ட விமானத்தில் 66 பயணிகளும் இரண்டு குழந்தைகளும் பயணித்தனர். இந்த விமானம் காலை 5:05 மணிக்கு கோவை வந்தடைந்தது.

நீண்ட நாள் கோரிக்கையான கோவை- கோவா இடையிலான நேரடி விமான சேவை துவங்கியுள்ளது பயணிகள் மத்தியில் மிகுந்த மகிழ்ச்சியை ஏற்படுத்தி உள்ளது.