கோவையில் கொரோனா இறப்பிற்கான மருத்துவ சான்று பெறுவதில் ஏற்படும் சிக்கலை கையாள குழு அமைப்பு - மாவட்ட ஆட்சியர் தகவல்..!

கோவை: கோவையில் கொரோனா இறப்பிற்கான மருத்துவ சான்று பெறுவதில் ஏற்படும் சிக்கலை கையாள குழு அமைக்கப்பட்டுள்ளதாக மாவட்ட ஆட்சியர் ஜி.எஸ் சமீரன் தெரிவித்துள்ளார்.

இது தொடர்பாக மாவட்ட ஆட்சியர் வெளியிட்டுள்ள அறிக்கையில் கூறியிருப்பதாவது :-

பொதுவாக இறப்பு சான்றிதழ்களில் இறப்பிற்கான காரணம் குறிப்பிடப்படுவதில்லை. ஆனால், கொரோனா தொற்றினால் ஏற்படும் இறப்புகளுக்கு நிவாரண தொகை மற்றும் பல சலுகைகள் பெற இறப்பின் காரணம் அவசியமாகிறது.

எனவே, இறப்பின் காரணத்தை அறிய மருத்துவமனைகளில் நிகழும் இறப்புகளுக்கு படிவம் 4ம், வீடுகளில் நிகழும் இறப்பிற்கு 4 விலும் இறப்பின் காரணத்திற்கான சான்று வழங்கப்படுகிறது. இந்த இறப்பின் காரணத்திற்கான சான்றை பிறப்பு, இறப்பு பதிவாளர்களிடம் சம்மந்தப்பட்ட நபர்கள் பெற்றுக் கொள்ளலாம்.

இந்த இறப்பிற்கான மருத்துவ சான்றிதழ் (4/44) கிடைக்கப் பெறாதவர்கள் மற்றும் கொரோனா இறப்பிற்கான காரணத்தில் திருப்தி இல்லாதவர்கள் மாவட்ட ஆட்சியரிடம் உரிய ஆவணங்களுடன் மனு அளிக்கலாம்.

இதற்காக, மாவட்ட வருவாய் அலுவலர் மற்றும் மாவட்ட பிறப்பு இறப்பு - பதிவாளர் தலைமையில், மாநகராட்சி ஆணையாளர், இணை இயக்குனர் சுகாதார பணிகள், மருத்துவக் கல்லூரி முதல்வர், துணை இயக்குனர் சுகாதார பணிகள் மற்றும் மாவட்ட தொற்று நோயியல் நிபுணர் ஆகியோர் அடங்கிய கொரோனா இறப்பினை உறுதி செய்யும் குழு (COVID -19 DEATH ASCERTAINING COMMITTEE) அமைக்கப்பட்டுள்ளது.

அதன் மூலம் பெறப்படும் மனுக்களை இந்த குழு பரிசீலனை செய்து தகுதி வாய்ந்த நபர்களுக்கு உரிய படிவத்தில் இறப்பின் காரணத்திற்குரிய சான்று வழங்கப்படும்.

எனவே, கொரோனா தொற்றினால் இறந்த யாருக்கேனும் இறப்பின் காரணத்திற்கான சான்று கிடைக்கப் பெறவில்லை என்றால், இந்த வாய்ப்பினை பயன்படுத்திக் கொள்ளுமாறு கேட்டுக் கொள்ளப்படுகிறது.

இவ்வாறு மாவட்ட ஆட்சியர் தெரிவித்துள்ளார்.