கோவை கணபதி பகுதியில் வீட்டின் மீது விழுந்துள்ள மரத்தை அகற்றக் கோரி திமுக சார்பில் வருவாய் வட்டாட்சியரிடம் மனு!

கோவை: கோவை கணபதி பகுதியில் பெய்த மழையின் காரணமாக வீட்டின் மீது விழுந்துள்ள மரத்தை உடனே அகற்றி தரும்படி திமுக சார்பில் மனு அளிக்கப்பட்டது.

கோவை மாநகர் தெற்கு மாவட்டம் கணபதி பகுதி 46வது வட்ட கஸ்தூரிபாய் வீதியில் மல்லிகா என்ற பெண் வசித்து வருகிறார். இவர் வீட்டின் மீது அருகாமையில் இருந்த மரம் பலத்த காற்றில் ஒடிந்து விழுந்தது. இதனால் அவர்களுடைய இயல்பு வாழ்க்கை பாதிக்கப்பட்டது.

இதனிடையே, பலமுறை அந்தப் பெண் மாநகராட்சியிடம் மனு கொடுத்தும் நடவடிக்கை எடுக்கப்படவில்லை. தொடர்ந்து அந்த பெண் கோவை கணபதி பகுதி 46 -வது வட்ட திமுக பொறுப்புக்குழு உறுப்பினர் கணபதி சம்பத் குமாரிடம் முறையிட்டார்.

இதனைத் தொடர்ந்து, பொறுப்புக் குழு உறுப்பினர் கணபதி சம்பத் குமார் கோவை மாவட்ட வருவாய் வட்டாட்சியரிடம் மல்லிகா வீட்டில் விழுந்த மரத்தை முற்றிலுமாக அகற்றி தருமாறு கோரிக்கை அடங்கிய மனுவை அளித்தார்.

இந்த நிகழ்வின் போது, கணபதி பகுதி பொறுப்புக் குழு உறுப்பினர் கணபதி முருகேசன், மாணவரணி தர்மா, இளைஞரணி ஜெகதீஸ், காமராஜ் உட்பட பலர் உடனிருந்தனர்.

இதையடுத்து, மனுவை பெற்றுக்கொண்ட வருவாய் வட்டாட்சியர் உடனடியாக நடவடிக்கை எடுப்பதாக உறுதியளித்தனர்.