கோவையில் உள்ள பிரபல ஹோட்டலின் 4.12 கோடி வரி பாக்கியை உடனடியாக செலுத்த வேண்டும் - மாநகராட்சி ஆணையர் உத்தரவு!

கோவை: கோவையில் உள்ள பிரபல ஹோட்டலின் 4.12 கோடி வரி பாக்கியை உடனடியாக செலுத்தக் கோரி மாநகராட்சி ஆணைய‌ர் ராஜகோபாலன் சுங்காரா உத்தரவிட்டுள்ளார்.

கோவை - அவிநாசி ரோட்டில், நவஇந்தியா பஸ் ஸ்டாப் அருகில், 'ரேடிசன் ப்ளு' எட்டு மாடி ஓட்டல் செயல்படுகிறது. 2,06,695 சதுரடிக்கு கட்டட வரைபட அனுமதி பெறப்பட்டிருக்கிறது. ஆனால், 2,20,363 சதுரடிக்கு கட்டடம் கட்டப்பட்டுள்ளது.

இந்நிலையில், விதிமுறை மீறி கட்டுமானம் செய்திருப்பது, மாநகராட்சி அதிகாரிகள் ஆய்வில் தெரியவந்தது.

2008க்கு முந்தைய வருடாந்திர வாடகை மதிப்பு நிர்ணயம் செய்திருக்க வேண்டும். ஆனால், தற்போதைய வருடாந்திர வாடகை நிர்ணயம் செய்யப்பட்டு இருக்கிறது. வரி விதிப்பை மாற்றித்தர வேண்டும் என, ஓட்டல் தரப்பில் கோரிக்கை விடுக்கப்பட்டிருந்தது.

இதுதொடர்பான ஆவணங்களை, மாநகராட்சி ஆணையர் ராஜகோபாலன் சுங்காரா மற்றும் வருவாய் பிரிவினர் மீண்டும் ஆய்வு செய்தனர்.

2008-க்கு முன் கட்டிய கட்டடங்களுக்கே, 2008-க்கு முந்தைய வருடாந்திர வாடகை மதிப்பு நிர்ணயம் செய்ய முடியும். புதிய கட்டடங்களுக்கு இவ்விதி பொருந்தாது என கூறி, கோரிக்கையை ஆணையர் நிராகரித்தார்.

இறுதியாக, 2016-17 முதல், 2021-22 வரை செலுத்த வேண்டிய சொத்து வரி, 4 கோடியே, 4 லட்சத்து, 76 ஆயிரத்து, 589 ரூபாய், காலியிட வரி, 7 லட்சத்து, 68 ஆயிரத்து, 745 ரூபாய் என மொத்தம், ரூ. 4,04,76,589 கோடியை உடனடியாக செலுத்த வேண்டுமென, மாநகராட்சி ஆணையர் ராஜகோபாலன் சுங்காரா உத்தரவிட்டார்.