கோவையில் விமானத்தில் பார்சல் மூலம் துப்பாக்கி அனுப்பியதாக சேலம் டாக்டர் மீது போலீஸார் வழக்கு பதிவு..!

கோவை: கோவையில் பார்சல் மூலம் விமானத்தில் துப்பாக்கி அனுப்பியதாக சேலத்தைச் சேர்ந்த டாக்டர் மீது போலீஸார் வழக்குப் பதிவு செய்துள்ளனர்.

சேலத்தைச் சேர்ந்த சாமுவேல் ஸ்டீபன் என்ற டாக்டர் கடந்த சில நாட்களுக்கு முன்பு உத்தரப்பிரதேசம் மாநிலத்தில் இருந்து ஏர் பிஸ்டல் துப்பாக்கியை ஆன்லைன் மூலம் வாங்கியிருந்தார். வாங்கிய ஏர் பிஸ்டல் துப்பாக்கியில் பழுது இருந்ததால் அதனை மீண்டும் கொரியர் மூலம் சம்பந்தப்பட்ட நிறுவனத்திற்கு டாக்டர் சாமுவேல் ஸ்டீபன் திருப்பி அனுப்பி வைத்தார். அந்த கொரியர் நிறுவனம் துப்பாக்கி பார்சல் குறித்த எந்த விவரங்களையும் விமான நிலைய அதிகாரிகளுக்கு தெரிவிக்காமல் விமானம் மூலம் அனுப்புவதற்காக விமான நிலையம் கொண்டு சென்றனர். பார்சல்களை சோதித்த விமான நிலைய அதிகாரிகள் துப்பாக்கி ஒன்று இருப்பதைக் கண்டு அதிர்ச்சி அடைந்து சம்பந்தப்பட்ட கொரியர் நிறுவனத்தை அழைத்து விசாரணை நடத்தினர்.

மேலும் இதுகுறித்து, டாக்டர் சாமுவேல் ஸ்டீபனையும் நேரில் அழைத்து விசாரணை நடத்தினர். இதையடுத்து முறையான தகவல் தெரிவிக்காமல் துப்பாக்கியை கொரியர் மூலம் விமானத்தில் அனுப்பி வைக்க முயன்றதாக டாக்டர் சாமுவேல் ஸ்டீபன் மீது விமான நிலைய தலைமை பாதுகாப்பு அதிகாரி முருகன் பீளமேடு போலீஸில் புகார் அளித்தார். புகாரின் பேரில் போலீஸார் டாக்டர் சாமுவேல் ஸ்டீபன் மீது வழக்குப்பதிவு செய்து விசாரணை நடத்தி வருகின்றனர்.