கோயம்புத்தூர் மாநகராட்சி மக்கள் குறைதீர்க்கும் நாள் கூட்டத்தில் 139 மனுக்கள் பெறப்பட்டன

Coimbatore: கோயம்புத்தூர் மாநகராட்சி பிரதான அலுவலகத்தில் மேயர் கா.ரங்கநாயகி ராமச்சந்திரன் தலைமையிலும், மாநகராட்சி ஆணையாளர் கட்டா ரவி தேஜா முன்னிலையிலும் மக்கள் குறைதீர்க்கும் நாள் கூட்டம் இன்று (28.07.2026) நடைபெற்றது. இக்கூட்டத்தில் பொதுமக்களிடமிருந்து பல்வேறு கோரிக்கைகள் அடங்கிய 139 மனுக்கள் பெறப்பட்டன.

பிறப்பு, இறப்பு சான்றிதழ்கள், சாலை வசதி, மின்விளக்குகள், குடிநீர் வசதி, பாதாள சாக்கடை, தொழில்வரி, சொத்துவரி, புதிய குடிநீர் இணைப்பு, பெயர் மாற்றம் உள்ளிட்ட பல்வேறு கோரிக்கைகள் மனுக்களில் இடம்பெற்றிருந்தன. மேயரும் ஆணையாளரும் இந்த மனுக்களைப் பெற்றுக்கொண்டு, சம்பந்தப்பட்ட அலுவலர்களிடம் விவரங்களை கேட்டறிந்தனர்.

ஏற்கெனவே பெறப்பட்ட மனுக்களின் மீது எடுக்கப்பட்ட நடவடிக்கைகள் குறித்து மண்டல உதவி ஆணையாளர்கள், பொறியாளர்கள் மற்றும் அலுவலர்களிடம் விசாரணை நடத்தப்பட்டது. தற்பொழுது பெறப்பட்ட மனுக்கள் மீதும் உடனடியாக நடவடிக்கை மேற்கொள்ள வேண்டும் என்று மேயரும் ஆணையாளரும் அறிவுறுத்தினர்.

இக்கூட்டத்தில் துணை மேயர் ரா.வெற்றிசெல்வன், துணை ஆணையாளர்கள் த.குமரேசன், ர.சரஸ்வதி, நகர்நல அலுவலர் Dr வீ.சி.சுபாஷ் காந்தி, உதவி ஆணையர்கள் நர்மதா (மேற்கு), தட்சிணாமூர்த்தி (தெற்கு) ஆகியோர் கலந்துகொண்டனர். செயற்பொறியாளர்கள், உதவி செயற்பொறியாளர்கள், மண்டல சுகாதார அலுவலர்கள், பொறியாளர்கள், சுகாதார ஆய்வாளர்கள் உள்ளிட்ட மாநகராட்சி அனைத்து அலுவலர்களும் இந்த குறைதீர்க்கும் நாள் கூட்டத்தில் பங்கேற்றனர்.