கோவையில் நீண்ட நாட்களுக்குப் பிறகு இன்று 10 விமானங்கள் இயக்கம்..!

கோவை: கோவையில் நீண்ட நாட்களுக்குப் பின் இன்று 10 விமானங்கள் இயக்கப்பட்டு வருகின்றன.

கொரோனா நோய்த்தொற்று பரவல் காரணமாக கோவை விமான நிலையத்தில் தினமும் இயக்கப்படும் விமானங்கள் எண்ணிக்கை வெகுவாக குறைந்து வந்தது.

இந்நிலையில், பல நாட்களுக்குப் பின் இன்று 10 விமானங்கள் இயக்கப்படுகின்றன. அதிகாலை 5:00 மணிக்கு 'ஏர் அரேபியா' விமானம் ஷார்ஜாவுக்கு இயக்கப்பட்டது. அதனைத் தொடர்ந்து பெங்களூரு, ஹைதராபாத், மங்களூரு, சென்னை, மும்பை, டெல்லி உள்ளிட்ட நகரங்களுக்கு விமான சேவை வழங்கப்படுகின்றன.

மேலும், இன்று கடைசி விமானம் இரவு 9:55 மணிக்கு கோவையில் இருந்து சென்னை புறப்படுகிறது. உள்நாட்டு விமான சேவையில் 'இண்டிகோ', 'ஏர் இந்தியா', 'கோ ஏர்' உள்ளிட்ட நிறுவனங்கள் விமானங்களை இயக்குகின்றன.

நோய்தொற்று பரவலுக்கு முன் தினமும் சராசரியாக 33 விமானங்கள் கோவையில் இயக்கப்பட்ட நிலையில், கடந்த சில வாரங்களாக தினமும் ஆறு விமானங்கள் மட்டுமே இயக்கப்பட்டு வந்தது குறிப்பிடத்தக்கது.