கோவை தெற்கு தொகுதியில் தாமரை மலரும் - பாஜக வேட்பாளர் வானதி சீனிவாசன் நம்பிக்கை!

கோவை: கோவை தெற்கு தொகுதியில் தாமரை மலரும் என்று பாஜக வேட்பாளர் வானதி சீனிவாசன் நம்பிக்கை தெரிவித்துள்ளார்.



கோவை தெற்கு சட்டமன்றம் தொகுதி பாஜக வேட்பாளரும் தேசிய மகளிர் அணி தலைவியுமான வானதி சீனிவாசன் தெற்கு தொகுதிக்குட்பட்ட டாடாபாத் பகுதியிலுள்ள வாக்குச்சாவடியில் மக்களுடன் வரிசையில் நின்று தனது வாக்கினை பதிவு செய்தார். அவரைத் தொடர்ந்து அத்தொகுதிக்குட்பட்ட பாஜக தொண்டர்களும் தங்கள் வாக்குகளைப் பதிவு செய்தனர்.

பின்னர் செய்தியாளர்களை சந்தித்த அவர் பேசியதாவது:

ஜனநாயக அமைப்பில் வாக்களிப்பது என்பது தலையாய கடமையாகும். ஐந்து வருடத்திற்கு ஒருமுறை நம்மை ஆள்பவர்களை தேர்வு செய்வது நமது உரிமையாகும். நல்லவர்களை ஆதரித்து அவர்களை தேர்ந்தெடுக்க வேண்டும்.

இந்த ஒரு நாள் என்பது நமது அனைவரின் வாழ்க்கையிலும் மிக முக்கியமான நாளாகும். அனைவரும் வாக்களிக்க வேண்டும் என்று மக்களுக்கு வேண்டுகோள் விடுக்கிறேன். வாக்களிப்பது என்பது ஒட்டுமொத்த சமுதாயத்திற்கும் நாட்டிற்கும் நாம் அளிக்கக் கூடிய மிக முக்கிய பங்களிப்பு என்பதை கூறிக் கொள்ள கடமைப்பட்டுள்ளேன்.

கோவை தெற்கு சட்டமன்ற தொகுதி தாமரை மலரும் தொகுதியாக நிச்சயம் இருக்கும். இவ்வாறு அவர் கூறினார்.