வீட்டு உபயோக பொருட்கள் விற்பனை கடையில் உரிய ரசீது இல்லாத குக்கர்கள் பறிமுதல்!

உடுமலை; உரிய கொள்முதல் ரசீது இல்லாமல் உடுமலையில் வீட்டு உபயோகப் பொருட்கள் விற்கும் கடையில் வைக்கப்பட்டிருந்த குக்கர்களை வருவாய்துறையினர் பறிமுதல் செய்தனர்.

உடுமலையில் உள்ள ஒரு வீட்டு உபயோகப் பொருட்கள் விற்பனை செய்யும் கடையில் தேர்தலுக்காக இலவசமாக தருவதற்கு ஏராளமான குக்கர்கள் வைக்கப்பட்டிருப்பதாக வருவாய்த்துறையினருக்கு ரகசிய தகவல் கிடைத்தது. குக்கர் சின்னத்தில் போட்டியிடும் அமமுகவினர்தான் இவ்வாறு குக்கர்களை விநியோகிக்க திட்டமிட்டிருப்பதாகவும் தகவல் பரவியது.



தகவலின் அடிப்படையில் உடுமலை வஉசி வீதியிலுள்ள வீட்டு உபயோக பொருட்கள் விற்பனை செய்யும் கடையில் வருவாய் துறையினர் விசாரணை மேற்கொண்டனர். லாரிகளில் இருந்து கடையில் இறக்கப்பட்ட குக்கர் பார்சல்களுக்கு உரிய கொள்முதல் ரசீதுகள் கடை உரிமையாளரிடம் இல்லை என தெரியவந்தது.

இதையடுத்து கடையில் வழக்கமாக எத்தனை குக்கர்கள் விற்பனை ஆகும். இதற்கு முன்பு இது போல அதிக குக்கர்கள் கொள்முதல் செய்யப்பட்டு இருக்கிறதா என்று விசாரணை செய்தனர். கடையின் உரிமையாளர் அளித்த பதிலில் திருப்தி இல்லாததால் குக்கர்களை வருவாய்த்துறையினர் பறிமுதல் செய்தனர். பறிமுதல் செய்யப்பட்ட குக்கர்கள்வட்டாட்சியர் அலுவலகத்தில் வைக்கப்பட்டுள்ளன.