தரமற்ற கையுறை தயாரித்து 98 லட்சம் மோசடி: பெண் உள்பட 2 பேர் கைது!

கோவை: தரமற்ற கையுறை தயாரித்ததுடன் ஏற்கெனவே பயன்படுத்தப்பட்ட கையுறைகளை கொடுத்து ரூ. 98 லட்சம் மோசடி செய்த பெண் உள்பட 2 பேர் கைது செய்யப்பட்டனர்.

பெங்களூரில் செயல்பட்டு வரும் தனியார் நிறுவனம் ஒன்று தனியார் மருத்துவமனைகள் மற்றும் தொண்டு நிறுவனங்களுக்கு பாதுகாப்பு கையுறை வழங்கி வந்தது. இதற்காக கோவை கவுண்டம்பாளையத்தில் இயங்கிவரும் புளு ஹர்ச்சிட்ஸ் நிறுவனத்திடம் கடந்த மே மாதம் 98 லட்சம் ரூபாய்க்கு தவணை முறையில் கையுறை வாங்கியது.

இந்நிலையில் அந்த கையுறைகள் அனைத்தும் சேதமடைந்திருந்தது தெரியவந்தது. மேலும் அவற்றை பரிசோதித்துப் பார்த்ததில் அவை ஏற்கெனவே பயன்படுத்தப்பட்ட கையுறைகள் என்பதும் தெரியவந்தது. இதையடுத்து அந்த நிறுவனத்தின் நிர்வாக இயக்குனர் ரோஹித் என்பவர் புளு ஹர்ச்சிட்ஸ் நிறுவனத்தை நடத்திவரும் கீதா அகர்வாலிடம் தங்கள் நிறுவனம் அளித்த ரூபாய் 98 லட்சத்தை திருப்பித் தருமாறு கேட்டுள்ளார். அதற்கு எந்த பதிலும் அளிக்காததால் கீதா அகர்வால் மற்றும் அவரின் கூட்டாளி பாலாஜி என்பவர் மீது கோவை மாநகர குற்றப்பிரிவு போலீசாரிடம் ரோகித் புகார் அளித்தார்.

வழக்கை விசாரித்த உதவி ஆணையர் உத்தரவின்பேரில் அப்பாதுரை கீதா அகர்வால் மற்றும் பாலாஜியை போலீசார் கைது செய்து நீதிமன்றத்தில் ஆஜர்படுத்தி சிறையில் அடைத்தனர். இவ்வழக்கில் சம்பந்தப்பட்ட மற்ற நபர்களையும் போலீசார் தேடி வருகின்றனர்.