கோவை: கோவையில் செல்போன் மூலம் விதவை பெண்ணுக்கு ஆபாசமாக பேசி தொல்லை கொடுத்த நபரை உறவினர்கள் அடித்ததில் மரணமடைந்த சம்பவம் பெரும் பரபரப்பை ஏற்படுத்தியுள்ளது.
கோவை: கோவையில் செல்போன் மூலம் விதவை பெண்ணுக்கு ஆபாசமாக பேசி தொல்லை கொடுத்த நபரை உறவினர்கள் அடித்ததில் மரணமடைந்த சம்பவம் பெரும் பரபரப்பை ஏற்படுத்தியுள்ளது.
கோவை அடுத்து மேட்டுப்பாளையம் அருகே உள்ள காரமடை பெரியார் நகர் பகுதியை சேர்ந்தவர் தனலட்சுமி. கணவர் இறந்த நிலையில் தனது மகளுடன் வசித்து வருகிறார்.
இந்நிலையில், கடந்த ஒரு வாரத்திற்கு முன் தனலட்சுமியின் அலைபேசியில் ஒரு அழைப்பு வந்தது. அதில் பேசிய நபர் ஆபாசமாக பேசியதுடன் தொடர்ந்து அலைபேசி மூலம் ஆபாசமாக பேசி தொல்லை கொடுத்து உள்ளார். மேலும், தன்னுடன் உல்லாசமாக இருக்க வருமாறு அழைத்ததாக கூறப்படுகிறது.
இது குறித்து தனலட்சுமி தனது உறவினர்களிடம் முறையிட்டு உள்ளார். இந்த நிலையில், அந்த நபர் நேற்று போன் செய்து தனலட்சுமியை பார்க்க வருவதாக கூறி உள்ளார். அவருக்கு பாடம் புகட்ட எண்னி இருந்த நிலையில், இந்த சந்தர்ப்பத்தை எதிர்பார்த்து காத்து இருந்த தனலட்சுமி நைசாக பேசி வீட்டிற்கு வரவைத்து உள்ளார்.
இதனிடையே, வீட்டின் உள்ளே அந்த நபர் நுழைந்ததும் தயாராக இருந்த அவரது தாயார் மற்றும் உறவினர்கள் அவரை பிடித்து மரத்தில் கட்டி வைத்து சரமாரியாக தாக்கி உள்ளனர். தனலட்சுமியின் உறவினர்கள் தாக்கியதில் அந்த நபர் உயிரிழந்து உள்ளார்.
இதனை தொடர்ந்து, அந்த நபரை வீட்டின் அருகே உள்ள தண்டவாளத்தில் வீசி உள்ளனர். ரயில் தண்டவாளத்தில் ஆண் பிணம் கிடப்பதாக அப்பகுதி மக்கள் காவல்துறையினருக்கு தகவல் அளித்து உள்ளனர்.
பின்னர், சம்பவ இடத்திற்கு வந்த போலீசார் விசாரணை மேற்கொண்டதில் அந்த நபர் அடித்து கொல்லப்பட்டு தண்டாவாளத்தில் வீசப்பட்டது தெரிய வந்தது. உயிரிழந்த அந்த நபர் கோவை இரத்தினபுரி பகுதியை சேர்ந்த பெரியசாமி என்பதும் திருமணமாகி மனைவியை பிரிந்து தனியாக வாழ்ந்து வருவதும் தெரியவந்தது.
அலைபேசி மூலம் ஆபாசமாக பேசி அழைப்பு விடுத்தவரை தாக்கியதால் மரணமடைந்த சம்பவம் தொடர்பாக காரமடை போலீசார் வழக்கு பதிவு செய்து ஐந்து பேரிடம் விசாரணை மேற்கொண்டு வருகின்றனர்.