வால்பாறையில் சத்துணவு கூடத்தை இடித்து அரிசி, சத்துணவு பாத்திரங்களை சேதப்படுத்தி காட்டு யானைகள் அட்டகாசம்!

கோவை: வால்பாறையில் காட்டு யானைகள் சத்துணவு கூடத்தை இடித்து அரிசி, பருப்பு மற்றும் சத்துணவு பாத்திரங்களை சேதப்படுத்திய சம்பவம் பொதுமக்களிடையே அச்சத்தை ஏற்படுத்தியுள்ளது.

கோவை மாவட்டம் வால்பாறையை அடுத்துள்ள கருமலை எஸ்டேட் பகுதியில் அரசு உதவி பெறும் நடுநிலைப்பள்ளி அமைந்துள்ளது. இந்தப் பள்ளி மிகவும் பழமைவாய்ந்த பள்ளி. இதனைச் சுற்றி களைகள் முளைத்து அடர்ந்த காடு போல் காணப்படுகிறது.



இந்நிலையில், அங்குள்ள பள்ளியில் உள்ள சத்துணவு கூடத்தை நேற்று இரவு 2 மணியளவில் 16 காட்டு யானைகள் கொண்ட கும்பல் சத்துணவு வைப்பு அறையை உடைத்து அரிசி, பருப்பு மற்றும் சத்துணவு பாத்திரங்களை உடைத்து சேதப்படுத்தி உள்ளது.

இதனிடையே, காலையில் அங்கு வந்த சத்துணவு ஊழியர்கள் உடனடியாக வனத்துறை மற்றும் எஸ்டேட் நிர்வாகத்திற்கும் நகராட்சி அலுவலகத்திற்கு தகவல் தெரிவிக்கப்பட்டு உடனடியாக அதிகாரிகள் நேரில் பார்வையிட்டனர்.

மேலும் அப்பகுதியில் இருந்த காட்டு யானை கூட்டத்தை வனத் துறையினர் உடனடியாக நேரில் வந்து பார்த்து அடர்ந்த காட்டுப்பகுதிக்குள் விரட்டியடித்தனர்.

தொடர்ந்து 16 காட்டு யானைகள் அப்பகுதியில் முகாமிட்டுள்ளதால் அப்பகுதியில் உள்ள மக்கள் பீதியில் உள்ளனர்.