கோழிக்கோடு விமான விபத்து: நீலகிரியைச் சேர்ந்த 3 பேர் சிக்கியுள்ளதால் உறவினர்கள் கவலை!

நீலகிரி: கோழிக்கோடு கரிப்பூர் விமான நிலையத்தில் விபத்துக்குள்ளான விமானத்தில் நீலகிரியைச் சேர்ந்த 3 பேர் சிக்கியுள்ளதால் அவர்களது உறவினர்கள் கலக்கத்தில் உள்ளனர்.

வந்தேபாரத் திட்டத்தின் கீழ் துபாயில் இருந்து கேரள மாநிலம் கோழிக்கோடு கரிப்பூர் விமான நிலையத்திற்கு நேற்று ஏர் இந்தியாவின் ஐ.எக்ஸ்.-1344 விமானம் வந்தது. அந்த விமானத்தில் 10 குழந்தைகள், 2 விமானிகள், ஐந்து பணிப்பெண்கள் உள்பட மொத்தம் 191 பேர் பயணம் செய்தனர்.



விமானம் கரிப்பூர் விமான நிலையத்தில் தரையிறங்க முற்பட்டபோது ஓடுதளத்தில் இருந்து சறுக்கிக்கொண்டு பள்ளத்தாக்கில் கவிழ்ந்து விபத்துக்குள்ளானது. இந்த விபத்தில் விமானி, துணை விமானி உள்பட இதுவரை 18 பேர் உயிரிழந்துள்ளனர்.

இந்நிலையில், கோழிக்கோடு கரிப்பூர் விமான நிலையத்தில் விபத்துக்குள்ளான விமானத்தில் நீலகிரி மாவட்டம் கூடலூரை அடுத்த பாடந்துரை கிராமம் பொன் வயல் பகுதியை சேர்ந்த பைசல் பாபு, அவரது மனைவி சாஜிதா மற்றும் கூடலூர் பள்ளிப்படி பகுதியை சேர்ந்த சாஜஹான் என்பவரது மகளான சாதனா சாஜஹான் ஆகிய மூவரும் துபாயில் இருந்து இந்த விமானத்தில் வந்து விபத்தில் சிக்கியுள்ளனர். இதனால் அவர்களது உறவினர்கள் கலக்கத்தில் உள்ளனர்.