கோவையில் பயங்கரவாத தாக்குதலுக்கு திட்டமிட்டதாக மூவர் கைது செய்யப்பட்ட வழக்கு விசாரணை ஒத்திவைப்பு

கோவை : கோவையில் பயங்கரவாத தாக்குதலுக்கு திட்டமிட்டதாக 3 இளைஞர்கள் கைது செய்யப்பட்ட வழக்கின் விசாரணை நாளை மதியம் ஒரு மணிக்கு ஒத்திவைக்கப்பட்டது. 

சர்வதேச பயங்கரவாத அமைப்புடன் தொடர்பிருப்பதாகவும், கோவையில் பயங்கரவாத தாக்குதல் நடத்த திட்டமிட்டிருந்ததாகவும் கோவையைச் சேர்ந்த முகமது உசேன், ஷாஜகான் மற்றும் ஷேக் சபிபுல்லா ஆகிய 3 பேர் யு.ஏ.பி.ஏ. சட்டத்தில் கைது செய்யப்பட்டனர். மூவரையும் 8 நாட்கள் காவலில் எடுத்து விசாரிக்க போத்தனூர் போலீசார் கோவை மாவட்ட முதன்மை நீதிமன்றத்தில் மனு தாக்கல் செய்தனர். இந்த மனு நீதிபதி சக்திவேல் முன்னிலையில் இன்று மதியம் 3 மணிக்கு விசாரணைக்கு வந்த போது, மூவரையும் நீதிமன்றத்தில் ஆஜர் செய்தனர். பின்னர், விசாரணை தொடங்கிய நீதிபதி, எதிர்தரப்பு அவகாசம் கேட்டதால் நாளை மதியம் வழக்கு விசாரணை ஒத்திவைத்து உத்தரவு பிறப்பித்தார். 

கடந்த 13-ம் தேதி கோவை மாநகர காவல்துறை மற்றும் வருவாய்த்துறை அதிகாரிகள் அதிகாலையில் இருந்தே முகமது உசேன், ஷாஜகான் மற்றும் ஷேக் சபிபுல்லா ஆகியோர் இல்லங்களில் விசாரணை மற்றும் ஆய்வு நடத்தினர். அதன்பின்னர், மூன்று பேரையும் போலீஸ் காவலில் எடுத்து ரகசிய இடத்தில் வைத்து 2 நாள் விசாரித்த போலீசார், அவர்கள் மீது சட்டவிரோத தடுப்பு காவல் சட்டத்தின் கீழ் கைது செய்தது குறிப்பிடத்தக்கது.