திருப்பூரில் இளைஞர் மீது கண்மூடித்தனமாக தாக்குதல் நடத்திய காவலர் மீது நடவடிக்கை எடுக்கக்கோரி முற்றுகை

திருப்பூர் : எந்தவித காரணமும் இல்லாமல் இளைஞரை கண்மூடித்தனமாக தாக்குதல் நடத்தியதுடன், பெண்களை தரக்குறைவாக பேசிய காவலர் மீது நடவடிக்கை எடுக்கக்கோரி பொதுமக்கள் மாநகர காவல் ஆணையர் அலுவலகத்தினை முற்றுகையிட்டு புகார் அளித்தனர். 



திருப்பூர் பலவஞ்சிபாளையம் பகுதியைச் சேர்ந்த சரவணன் என்பவர் தனியார் பின்னலாடை நிறுவனத்தில் பணிபுரிந்து வருகின்றனர். இந்த நிலையில், நேற்றைய தினம் பணிமுடிந்து இரவு வீட்டருகே சரவணன் நின்று கொண்டிருந்த போது, அவ்வழியே ரோந்து வந்த வீரபாண்டி காவல்நிலைய காவலர் கெளரிசங்கர் என்பவர், சரவணனை தகாத வார்த்தைகளால் பேசியுள்ளார். இதனை எதிர்த்து கேட்டதால் கையில் வைத்திருந்த லத்தியால் கடுமையாக தாக்கியதாகவும், இதில் சரவணனுக்கு இடுப்பு, கை பகுதிகளில் பலத்த காயமடைந்ததாகவும் கூறப்படுகிறது. 



இதனையடுத்து, அப்பகுதியினர் 108 ஆம்புலன்ஸ் மூலம் மருத்துவமனைக்கு அனுப்பி வைக்கும்போது திரும்ப வந்த காவலர் மீண்டும் தாக்கியதோடு, அங்கிருந்த பெண்களையும் தரக்குறைவாக பேசியதாகவும் அப்பகுதியினர் தெரிவித்தனர். 

எந்தவித காரணமும் இல்லாமல் இளைஞரை தாக்கியதுடன், பெண்களையும் தரக்குறைவாக பேசிய காவலர் மீது உடனடியாக நடவடிக்கை எடுக்க வேண்டும் என சரவணனின் பெற்றோர் உட்பட அப்பகுதியினர் மாநகர காவல் ஆணையர் அலுவலகத்தை முற்றுகையிட்டு மனு அளித்தனர். காயமடைந்த சரவணன் அரசு மருத்துவமனையில் சிகிச்சை பெற்று வருவது குறிப்பிடத்தக்கது.