982.5 கிலோ பிளாஸ்டிக் கவர்கள் பறிமுதல் : கோவை மாநகராட்சி அதிகாரிகள் அதிரடி

கோவை : கோவை மாநகரில் பல்வேறு இடங்களில் மாநகராட்சி அதிகாரிகள், கடந்த 11 நாட்கள் மேற்கொண்ட சோதனையில், 982.5 கிலோ பிளாஸ்டிக் கவர்கள் பறிமுதல் செய்யப்பட்டன.



தமிழகத்தில் கடந்த ஜனவரி 1-ம் தேதி முதல் ஒரு முறை மட்டும் பயன்படுத்தக்கூடிய 14 வகை பிளாஸ்டிக் கவர்கள், பொருட்களுக்கு தமிழக அரசு தடை வித்துள்ளது. இந்த தடையையடுத்து, கோவை மாநகராட்சி சார்பாக தடை செய்யப்பட்ட பிளாஸ்டிக் கவர்களை ஒழிக்க பல்வேறு நடவடிக்கைகளை மேற்கொண்டு வருகிறது. இதன் ஒரு பகுதியாக, கோவை மாநகராட்சி ஆணையாளர் ஷ்ரவன்குமார் ஜடவாத் உத்தரவில் பேரில், சுகாதார ஆய்வாளர்கள் மற்றும் ஊழியர்கள் கோவை, காந்திபுரம், வடவள்ளி, சக்தி ரோடு, ஆர்.எஸ். புரம், பூ மார்க்கெட் உள்ளிட்ட பல்வேறு பகுதிகளில் கடந்த ஏப்ரல் 22-ம் தேதி முதல் மே 2-ம் தேதி வரை சோதனை மேற்கொண்டனர். இதில், 3 ஆயிரத்து 369 கடைகள் மற்றும் ஓட்டல்களில் இருந்து 982.5 கிலோ பிளாஸ்டிக் கவர்கள் பறிமுதல் செய்யப்பட்டன. மேலும், பிளாஸ்டிக் கவர்கள் வைத்திருந்த உரிமையாளர்களுக்கு ரூ. 4 லட்சத்து 73 ஆயிரத்து 950 அபராதமும் விதிக்கப்பட்டது.



இன்று ஒரே நாளில் மட்டும் 174 கடைகளில் நடத்தப்பட்ட சோதனையில், 34 கிலோ பிளாஸ்டிக் கவர்கள் பறிமுதல் செய்யப்பட்டன. அதை வைத்திருந்த உரிமையாளார்களுக்கு ரூ. 38 ஆயிரத்து 100 அபராதம் விதிக்கப்பட்டது.