வாக்களிப்பதன் அவசியத்தை வலியுறுத்தி ரத்தினம் கல்லூரி சார்பில் விழிப்புணர்வு பேரணி

கோவை : வாக்களிப்பதன் அவசியத்தை வலியுறுத்தி ரத்தினம் கல்லூரி சார்பில் விழிப்புணர்வு பேரணி இன்று நடைபெற்றது.

இரத்தினவானி 90.8 சமுதாய வானொலியில் இந்திய தேர்தல் ஆணையம் உதவியோடு, ஸ்மார்ட் அமைப்புடன் இணைந்து தேர்தல் விழிப்புணர்வு நிகழ்ச்சிகள் ஒலிபரப்பி வருகின்றனர். இந்த நிகழ்ச்சி வாக்காளர் அடையாள அட்டைக்கு விண்ணப்பிக்கும் வழிமுறைகள், ஓட்டு போடுதலின் அவசியம், மற்றும் ஓட்டு உரிமை குறித்த விழிப்புணர்வு தகவல்கள் இடம்பெற்று உள்ளது. இதன் ஒருபகுதியாக, இன்று ரத்தினம் கல்லூரியில் இருந்து சிட்கோ வரை தேர்தல் விழிப்புணர்வு பேரணி நடத்தப்பட்டது. இந்த பேரணியில் ரத்தினம் கல்லூரி என்.எஸ்.எஸ்., மாணவர்கள் கலந்து கொண்டனர். தேர்தல் விழிப்புணர்வு பேரணியை மதுக்கரை வட்டாச்சியர் பழனிசாயும், ரத்தினம் கல்லூரி முதன்மை கல்வி அதிகாரி மாணிக்கமும் சேர்ந்து துவக்கி வைத்தனர். நிகழ்ச்சியில் கலந்துகொண்ட மதுக்கரை வட்டாச்சியர் பழனிசாமி, மாணவர்களுக்கு ஓட்டு உரிமை மற்றும் ஓட்டு போடுவதன் அவசியத்தை கூறினார். மேலும், ஓட்டுபோடுவதற்கு பரிசு வாங்குவது சட்டப்படி குற்றம் என்றும் அதை ஆதரிக்கக் கூடாது என்றும் மாணவர்களுக்கு விளக்கி கூறினார். 

பேரணியில் கலந்து கொண்ட மாணவர்கள் இந்திய தேர்தல் ஆணையத்தின் இலவச தொலைபேசி எண் 1950 பயன்பாடு, தேர்தல் ஆணையத்தின் மொபைல் அப்பிளிகேஷன்களான cVIGIL app மற்றும் Voters Helpline App குறித்த விவரங்களை துண்டு பிரசுரங்கள் ஆக பொதுமக்கள் இடத்தில் வழங்கினர். மேலும், ஓட்டு போட லீவு வேண்டும் என்ற வாசகம் இடம்பெற்ற துண்டு பிரசுரங்களை தேர்தல் நாளில் ஊதியத்துடன் தொழிலாளர்களுக்கு விடுமுறை அளிப்பதை வலியறுத்தி கொசிமா (Coimbatore SIDCO Industrial Estate Manufacturers Welfare Association) அலுவலகத்தில் வழங்கப்பட்டது.