நாடாளுமன்ற தேர்தலுக்கான மக்கள் நீதி மய்யத்தின் வேட்பாளர்கள் 24-ம் தேதி அறிவிப்பு

கோவை : 40 நாடாளுமன்ற தொகுதிகளுக்கான மக்கள் நீதி மய்யத்தின் வேட்பாளர்கள் அறிமுகக் கூட்டம் வரும் 24-ம் தேதி நடைபெறுகிறது.

நாடாளுமன்ற தேர்தலையொட்டி தமிழக அரசியல் கட்சிகள் தேர்தலை எதிர்கொள்வதற்கான ஆயத்த பணிகளில் தீவிரமாக ஈடுபட்டு வருகின்றன. அந்த வகையில், மக்கள் நீதி மய்யம் கட்சி முதல் தேர்தலை எதிர்கொள்ள இருக்கிறது. புதுச்சேரி உள்பட 40 தொகுதிகளிலும் தனித்துப் போட்டியிடவும் முடிவு செய்துள்ளது. இதையடுத்து, மக்கள் நீதி மய்யம் சார்பில் நாடாளுமன்ற தேர்தலில் போட்டியிட விருப்பம் தெரிவித்து 1,137 பேர் மனுவை பூர்த்தி செய்து வழங்கினர். அவர்களுக்கான நேர்காணல் கமல்ஹாசன் தலைமையில் துணைத் தலைவர் ஆர். மகேந்திரன் நேர்காணல் நடத்தினார். 

இந்த நிலையில், புதுச்சேரி உள்பட 40 நாடாளுமன்ற தொகுதிகளுக்கான மக்கள் நீதி மய்யத்தின் வேட்பாளர்கள் வரும் 24-ம் தேதி அறிவிக்கப்பட இருக்கின்றனர். இதற்கான அறிமுகக் கூட்டம் நடத்தப்படுவதாக தெரிவிக்கப்பட்டுள்ளது. 

நாடாளுமன்றத்திற்கான தேர்தல் தேதி நெருங்கி வரும் நிலையில், மக்கள் நீதி மய்யக் கட்சியினர் பொள்ளாச்சியில், கட்சியின் கொள்கைகள் அடங்கிய துண்டு பிரசுரங்களை கொடுத்து பிரச்சாரம் மேற்கொண்டது குறிப்பிடத்தக்கது.