இந்திய விமானப்படையின் மிக் 21 விமானத்தின் விமானியை காணவில்லை என இந்திய வெளியுறவுத்துறை அமைச்சகம் தெரிவித்துள்ளது.
இந்திய விமானப்படையின் மிக் 21 விமானத்தின் விமானியை காணவில்லை என இந்திய வெளியுறவுத்துறை அமைச்சகம் தெரிவித்துள்ளது.
காஷ்மீர் மாநிலம், புல்வாமா மாவட்டத்தில் நடந்து முடிந்த தற்கொலைப் படையினர் தாக்குதலுக்கு பிறகு, இந்தியா - பாகிஸ்தான் இடையில் அதீத பதற்றமான சூழல் நிலவி வருகிறது. இதனால், இந்தியா-பாகிஸ்தான் இடையே மோதல் போக்கு அதிகரித்துள்ளது. இதையடுத்து, புல்வாமா தாக்குதலுக்கு பதிலடி கொடுக்க, இந்திய விமானப் படை நேற்று பாகிஸ்தான் எல்லைப் பகுதியில் தாக்குதல் நடத்தியது. அந்த தாக்குதலுக்கு பதிலடி கொடுக்கும்விதமாக பாகிஸ்தான் விமானப்படை இன்று இந்தியாவின் மீது தாக்குதல் நடத்த முயற்சி செய்தது.
இந்நிலையில், பாகிஸ்தான் விமானத்துக்கு மிக் ரக விமானம் மூலம் பதிலடி கொடுக்க, இந்திய விமானி அபிநந்தன் சென்றார். தாக்குதலுக்கு சென்ற விமானி இன்னும் திரும்பவில்லை. இதற்கிடையில், அவர் சென்ற போர் விமானம் விபத்துக்குள்ளானது எனக்கூறப்படுகிறது.
இதனிடையே, பாகிஸ்தான் இந்திய விமானப்படை விமானத்தை சுட்டு வீழ்த்தியதாக கூறியதோடு அல்லாமல், சர்வீஸ் எண் 27981, அபிநந்தன் என்ற விமானியும் எங்கள் கட்டுப்பாட்டில் உள்ளார் என தெரிவித்துள்ளது இன்னும் அதிர்ச்சியை ஏற்படுத்துகிறது. தற்போது, மத்திய அரசின் சார்பில் விமானி ஒருவர் மாயமாகியுள்ளார் என தகவல் வெளியாகியுள்ளது.
இந்நிலையில், இந்திய வெளியுறவுத்துறை செய்தித்தொடர்பாளர் ராவீஷ்குமார் செய்தியாளர்களிடம் பேசினார். அப்போது, பாகிஸ்தானில் செயல்பட்டுவரும் ஜெய்ஷ் இ முகமது பயங்கரவாத இயக்கம் இந்தியாவில் மேலும் தாக்குதலை நடத்தலாம் என நம்பத்தகுந்த உளவுத்துறை தகவல்கள் கிடைக்கப்பெற்றது.
இந்தியா இதுதொடர்பாக கோரிக்கை விடுத்தும், பாகிஸ்தான் ஒரு நடவடிக்கையும் எடுக்கவில்லை. எனவே பயங்கரவாதத்தை அழிக்கும் வகையில் இந்திய விமானப்படை தாக்குதலை நடத்தியது. இதனையடுத்து, பாகிஸ்தான் விமானப்படை அத்துமீறிய நடவடிக்கையில் ஈடுபட்டது. மேலும், இந்திய வான்பகுதிக்குள் அத்துமீறிய பாகிஸ்தான் விமானப்படையின் விமானம் ஒன்று சுட்டு வீழ்த்தப்பட்டது. சுட்டு வீழ்த்தப்பட்ட விமானம் பாகிஸ்தான் எல்லைக்குள் விழுந்தது.
மறுபுறம் துரதிஷ்டவசமாக இந்தியா மிக் 21 விமானம் ஒன்றை இழந்துள்ளது. அந்த விமானத்திலிருந்து தாக்குதல் நடத்த சென்ற இந்திய விமானி எங்களுடைய கட்டுப்பாட்டில் உள்ளார் என பாகிஸ்தான் தரப்பு கூறியுள்ளது. இதிலுள்ள உண்மையை ஆய்வு செய்து வருகிறோம், எனத் தெரிவித்துள்ளார்.