கோவையில் நீர்வாழ் பறவைகளின் கணக்கெடுப்பு நிறைவு : பறவைகளின் எண்ணிக்கையில் வெள்ளலூர் குளம் முன்னிலை

கோவை : வனத்துறை சார்பில் மேற்கொள்ளப்பட்ட பறவைகள் கணக்கெடுப்பில் வெள்ளலூர் குளத்தில் 75 வகையான பறவையினங்கள் கண்டறியப்பட்டுள்ளன. 

கோவை மாவட்டத்தில், வனத்துறை மற்றும் இயற்கைக்கான உலகளாவிய நிதியம் (World Wide Fund for Nature) ஆகியவற்றால் பறவைகள் கணக்கெடுப்பு நிகழ்த்தப்பட்டது. கடந்த பிப்ரவரி மாதம் 7 மற்றும் 8 ஆகிய தேதிகளில் நடைபெற்ற இந்த கணக்கெடுப்பில் 65 தன்னார்வலர்கள் கலந்து கொண்டனர். 

இந்த மொத்த கணக்கெடுப்பும் கோவையில் உள்ள 26 குளங்கள் மற்றும் நீர்நிலைகள் ஆகியவற்றில் நடத்தப்பட்டன. கடந்த வருடம் உக்கடம் மற்றும் வெள்ளலூர் குளங்களில் எடுத்த கணக்கெடுப்பின் படி, 166 வகையான நீர்வாழ் மற்றும் அதனோடு தொடர்புடைய பறவைகள் கண்டறியப்பட்டன. 

இந்நிலையில், இந்த வருடம் வெள்ளலூர் குளத்தில் நடத்தப்பட்ட கணக்கெடுப்பில் 75 தனி வகையிலான பறவையினங்கள் கண்டறியப்பட்டன. பருவமழை மற்றும் தூர்வாருதல் காரணமாக ஏவியன் இனங்கள் இக்குளத்தை புகலிடமாக கொண்டுள்ளன. 

மேலும், மொத்தமாக 2484 பறவைகள் எண்ணிக்கை பதிவாகியுள்ளது. போன வருடத்தைவிட இவ்வருடம் பறவைகள் எண்ணிக்கை குறைந்துள்ளதிற்கு குளங்கள் மற்றும் அணைகளில் தண்ணீர் மட்டம் அதிகம் இருப்பதே என்கிறார் இயற்கைக்கான உலகளாவிய நிதியத்தின் இணை இயக்குனர் டி.பூமி நாதன். 

கடந்த வருடம் 160க்கும் மேலான பறவையினங்கள் அடையாளம் காணப்பட்ட நிலையில், இந்த வருடம் 115 இனங்களே கணக்கிடப்பட்டுள்ளன. கிருஷ்ணம்பதி (72), வாளையார் நீர்தேக்கம் (67), உக்கடம் (67), ஆகிய குளங்களில் அதிகபடியான பறவைகள் எண்ணிக்கையும், உக்குளம் (16), செல்வசிந்தாமணி (20), குமாராசாமி (24), சொட்டையாண்டி (24) ஆகியவற்றில் குறைந்த எண்ணிக்கையிலும் காணப்படுகின்றன.